Kut jingmut ka Sorkar ban pynbha iaki Iingskul ha Nongkyndong
Shillong, Risaw 28: U Myntri Rangbah ka jylla Conrad K. Sangma ha ka sngi baar, ula ong ba ka sorkar ka iengskhem ha ka ban pynbha ia ki jingtei jong ki skul kiba don ha ki thain nongkyndong.
“Ngi lah buh hakhmat eh ia ka pule puthi ba kan long kaba salonsar bad ban pynthikna ba baroh kin ioh ia ka lad” ula ong haba kren ha ka jingpynhap pyrda ia ka jingrakhe Jubili Rupa jong ka St. Anthony’s Higher Secondary School, Pynursla, East Khasi Hills.
“Lada phi kwah ban thung ban ioh kheit noh hadien shisnem kumta thung ia ki syntiew, lada phi kwah ban thung bad kheit ia u soh hadien shiphew snem kumta thung ia u dieng. Hynrei lada kwah ban don ka jingiohnong kaba shirta dei ban thung ia ki briew” ula ong haba pynkynamw ia katei ka kyntien kaba la sot na ka Proverb China.
Ula pyntip ba haduh 15 percent na ka bhah tyngka ka jylla jong une u snem la mang sha ka pule puthi kaba kot haduh T.3,654 Klur, kaba dei ruh ka mang tyngka kaba heh duh hapdeng ki tnad sorkar baroh.
“Ka jylla kala mad ia ki jingeh ha kane ka bynta, hynrei da ka jingtrei shitom kila lah ban pynbeit. Ka Meghalaya ka don palat 14,000 tylli ki skul kiba kyrshan da 55,000 ngut ki nonghikai bad jan kumba T. 1,000 klur la pynlut man la ka snem ban ai ia ki Grant sha ki skul Private, Adhoc bad Deficit School” ula ong bad ka bynrap “Ngi sngewsarong ia kane ka jingbei tyngka. Namar katei ba ka pule puthi kala kiew shaphrnag, watla ngi dang mad ia ki jingeh kum ka jingkiew ka jingiehnoh shiteng por ia ki skul bad ka jingduna ha ka jingpass bha ki khynnah”.
Ha kaba iadei bad ka jingai jingkyrshan ia ki skul shimet, u Myntri Ragbah ula ong, “Ka sorkar kan ai jingkyrshan pisa kaba naduh T.50 lakh haduh T.1 Klur sha ki katto katne ki skul kiba la shah jied kiba don ha kylleng jong ka jylla ban kyntiew noh ia ki sha ka Higher Secondary”.
“Kane ka scheme kadei kaba la pynwandur ban iarap ia ki jaka pule ki bym dei ki jong ka sorkar ban kyntiew ia ki jingdon jingem bad ia ki jait jingpule ha ki Stream ki bapher bapher” ula ong bad ka pynthikna ba ka St. Anthony’s Higher Secondary School, Pynursla, kan long ka skulk aba nyngkong kaban ioh ia kane ka jingiarap.
Haba pynpaw ia ki kyntien kiba u kpa jongu (Late) P. A. Sangma u ju kren, u Myntri Rangbah ula iaroh ia ki Balang kiba la pyndonkam bha bad thikna ia ka pisa paidbah. Ula pynkynmaw ba kumno lyngba ka jingnoh synniang kaba tang T.5 Lak ia ka skul mission dang ha u snem ba la dep kala lam sha ka jingtei ia ka iingskul kaba ar mala kaba don 14 tylli ki kamra skul.
Ula ai ruh ka jingiaroh ia ka kam bakhraw kaba la leh da ka Salesians of Don Bosco ha kaban pynwandur ia ka pule puthi ha Meghalaya bad ula ong, “Ki Salesians kila noh synniang bha sha ka jylla, ka thain bad ia ka ri ia kaba kiwei pat ki balang kim lah ban leh”.
Ula pynpaw ruh ka jingsngewnguh ia ki Salesian Father kiba rim bad kiba mynta bad ki nongialam jong ka skul, ki nonghikai bad ki nongtrei kiba la saindur ia ka lawei jong ki khynnah pule.
Ula ai khublei ruh ia ka skul halor ka jingdap 25 snem ha ka jingtrei minot ha kaban ai ia ka jingnang jingstad kaba paka bad ula iaroh ia ka skulk aba la iengskhem ban saindur ia ki khynnah ha ka liang ka pule puthi bad ha kaakor ka burom.
“Mynta ka sngi ngim rakhe tang ia ka jingdap 25 snem jongka Higher Secondary School, hynrei naduh ba la seng mynta la jan 70 snem ia ka LP section — Ka jingiaid lynti kaba da ka jingngeit, ka jinglen lade, ka jingtrei shitom bad ka jingbat skhem ia ka jingkular” ula ong.
Katba u Symbud Myntri Rangbah ka jylla u Bah Prestone Tynsong, ula iaroh ia ka St. Anthony’s Higher Secondary School halor kaj ingdap 25 snem ha kaban ai jingshakri ha ka pule puthi bad ula ong b aune u mawmer u long kum ka khyllipmat jong ka jingsngewsarong bad ka jingsngewnguh ia ka imlang sahlang hi baroh kawei.
