Shillong, Naitung 28: U Myntri ka tnat Tourism bah Paul Lyngdoh hynne ka sngi Thohdieng, ula pyntip ba ka sorkar jylla ka dang wad ia ki lynti thymmai naka bynta ban pyniaid ki kali ba kit iaki nong wan shangkai suwari khnang ba kin nym wanrah ia ka jingkhapngiah bad jingdheng kali ha Sor Shillong.
Haba kren sha ki lad pathai khubor u bah Paul ula iathuh ba ka surok Umiam- Mawlyndep ka dei kawei na ki surok baka sorkar ka thmu ban pyniaid iaki kali kamai ba kit iaki nongwan shangkai suwari hynrei kane ka surok ka dang don hapdeng ka jingpyntrei.
U Myntri ula iathuh ba dang shen ka sorkar kala pyllait iaki kali Innova ki ban kit iaki nongwan shangkai suwari naka bynta ban pyrkhing iaki kali na Assam ki ban kit iaki briew sha kylleng ki jylla.
Haduh mynta ka sorkar kala pyllait haduh 50 tylli ki kali ba kit iaki Nongwan shangkai suwari.
Haba kren halor ka jingdonkam ki Hotels bad ki Homestay, u bah Paul ula ong “Ngi dang wad khmih iaka jingdonkam ban tei iaki jaka sah daka ba wanrah daka Homestay Project haka ba 1000 tylli ki Homestay yn wanrah haduh u bnai Lber daka ba pyniakhlad iaki Homestay ha sor bad khapsor”.
U bah Paul ula iathuh ruh ba ka tnat ka dang pynkhreh iaki jaka sah ha Umiam bad Sohra.
