Shillong, Nohprah 17: U Symbud Myntri Rangbah ba khmih iaka tnat Urban Affairs Bah Sniawbhalang Dhar u la pynpaw ba ka jingthied jaka ban pynlong jaka theh nuit ba thymmai ka Shillong bad kiwei ki District Headquarter ka dang sahteng mynta namar ba dang don ka jingiakren bad ki trai jaka halor ka dor jaka.
“Haduh mynta ym pat don kano kano ka Public Hearing kumta ngi dang hap ban iakren ia ka dor bad ki trai jaka bad ngi la thaw ia ka Committee ba la khlieh da ki Deputy Commissioner lane u Director jong ka Urban Affairs” ong u Bah Sniawbhalang.
“Lada ka dor ka biang lang ïa baroh, ngi lah ban pyniaid shakhmat ia ka kam, hynrei lada ka dor ka long kaba heh palat, ïa kata ngin hap ban pyrkhat biang” ula ong.
Ha kaba iadei bad ka jaka bala tyrwa ban pynlong jaka theh nuit ba thymmai ha Nonghali, u Bah Sniabhalang u la ong “Ka Public Hearing ka la iaid beit iaid ryntih, bad ka bynta kaba kongsan ka dei ka dor mynta. Ngim lah ban iakren ia ka dor tad haduh baroh ki trai jaka bad ki paidbah ki mynjur lut bad mynta ngi dang iakren bad ki trai jaka bad ki nong shong shnong jong ka shnong Nonghali”.
U Symbud Myntri Rangbah u la pyntip ba ka jingwad jaka na ka bynta ki jaka theh niut ha kiwei pat ki district ka dang iaid shakhmat haba iathuh “Ha Jaiñtia Hills, ngi dang hap ban ithuh ïa ki jaka, hynrei ha Williamnagar bad Tura ngi la dep ban leh iaka ba donkam namar ngi lah ioh katto katne tylli ki jaka bad ki don ki jaka kiba ngi dang hap ban ithuh”.
“Ngi dang pyrshang ban ioh jaka ban tei jaka theh nuit thymmai ha baroh ki nongbah jong ki district ha kylleng ka jylla” u la bynrap.
Ha Jowai, u Symbud Myntri u la ong, “Ngi la ithuh 3-4 tylli ki jaka, hynrei ngi dang hap ban pynthikna, kano ka jaka ka long kaba biang eh ban tei jaka theh niut thymmai. Ki don 2-3 tylli ki jaka, hynrei ki paidbah ki pyrshah, kumta ngi la iehnoh ia kata kawei, bad ngi dang wad sha ki jaka thymmai”.
Haba ban jur baka Sorkar ka buh hakhmat ban don daka Waste Management, u Symbud Myntri u la ong “Ngin wad ki lad ki lynti kumno ban pynthikna ban nym don ki jaboh ha iew ha hat bad ki shnong ki thaw, kata ka dei ka thong jong ngi”.
