Shillong, Naiwieng 11 : Ka Sorkar Jylla ka dang shong pyrkhat ban wanrah noh da ka Ain ka ban tehlakam ia ki kam bymman ba mih na ki jingkynnoh “Menshohnoh/Nongaiksuid” ha ka Jylla.
Haba kren sha ki lad pathai khubor ha ka sngi Ba-ar, u Nongaibuit ka Tnad Social Welfare Bah Paul Lyngdoh ula ong ba kane ka dei ka kam kaba ka Tnad Ain ka hap ban pyndonkam ia ka jabieng namar ha kawei ka liang ngi don ia ki rukom leh bapher bapher kiba la rim bha bad ha kajuh ka por kine kim iahap bad ka synshar ain lada phi kren hi ia ka ain.
Kat kum ka jingong jong u, kane ka kam ka sngewdei ban don noh ia ka ain pyrshah kam “menshohnoh/nongaiksuid” (Anti-witchraft) ka ban donkam ia ka jingiasyllok bad ki Autonomous District Council (ADC) bad ka Tnad Ain.
“Kumta, ka dei ka mat kaba ïadei bha bad kaei kaba ngi la ïohi haduh mynta watla ka long ba ka jingdon jong kum kine ki jingjia ka la nang duna ha kine ki snem bad ngi ngeit skhem ba lada donkam ba kum kane ka aiñ kan don, kam dei tang ka sorkar jylla, ngi don ruh ïa ki ADC kaba don ia ka Tnad Ain ha ki Council- ngin donkam ia ka ain lyngba ka jingiasyllok bad ki ADC khnang ban gin lah ban wanrah ia ka Ain ka Jylla ne da ki ADC hi” ong u Bah Paul.
Ula pynpaw ia kane haba kren iaka jingjia ba dang shen ha Khliehshnong Sohra, ha kaba ki Pulit kila shimkhia mar mar ban iada ia ka longiing bad ki para marjan na ka jingshah bomshnong. Khyndai ngut ki briew kila shah kem bad shah pynngat ha ki kyndon bapher bapher jong ka Ain.
“Ka Tnad Social Welfare kala mih hakhmat, ai jingiada ia kane ka Longiing bad pynthikna ia ka jingshngain jong ki. Ki lanot mynta kila leit phai shala iing hadien ka jingsngew shaniah iala ka jong ka jingshngain” ong u Bah Paul.
