Shillong, Naitung 25 : Ka jingiahiar jurip lang hapdeng ki Regional Committee ka Assam bad Meghalaya sha ki 6 tylli ki jaka ba dang sah ban iapynbeit ia ka jingiakajia pud, ka lah ban sahteng namar ka jingwan ka elekshon Assembly ha Assam.
Ia kane la pynpaw da u Symbud Myntri Rangbah ka Jylla ba khmih ia ki kam Pohiing (Police) Bah Prestone Tynsong.
Haba kren sha ki nongthoh khubor, u Bah Prestone uba dei ruh u Chairman ka Regional Committee ka Ri-hoi District, ula iathuh ba ka jingpynkhreh ia ka elekshon Assembly ha Assam, ka ban long lashnem, ka lah ban pynbunkam ia baroh ki seng sain pyrthei,ki MLA bad ki Myntri Sorkar, kaba lah ban nang pynslem ia ka jingiajurip khappud.
U iathuh ba ka Meghalaya ka dang ap ia ki Committee na Assam ba kin buh ia ka tarik jurip khappud, ka ban long kylluid ia baroh arliang mamla.
“Ngi la dep kyrpad ia kane. To ngin ap bad hadien ba ngi la iohktien na ki, ngin sa buh noh ia ka tarik” bynrap u Bah Prestone.
Ula pynpaw ba na ka liang ka Assam ka don haduh 3-4 ngut ki Chairmen ha manla ki sector katba ka Meghalaya ka don tang 3 ngut ba kynthup ia u DyCM Bah Sniawbhalang Dhar ba khmih ia ka West Jaintia Hills bad Bah Paul Lyngdoh ia ka West Khasi Hills sector.
