Shillong, Naiwieng 22 : Ka Meghalaya Public Service Commission (MPSC) ka dang shong bishar ia ka jingtyrwa ban ring video noh ia baroh ki interview shimet ia ki nongapplai kam ban pynthikna ia ka jingkhuid ha ka rukom thungkam thungjam.
“Ngi dang shong bishar nadong hadong ia kane bad ngin sa pyntreikam ia ka (ring video ia ki interview shimet)” ong u Chairman ka MPSC Bah PR Marwein haba iakren bad ki nongthoh khubor.
Haba pynpaw ba ka jingring video ha ki hall thoh eksam kan long kaba eh namar ka jingbun ki jaka thoh eksam, u Bah Marwein ula ong “Hynrei ka dei kaba ngi kwah bad lehse ngi lah ban leh ia kane hadien habud”.
Halor ka jingdawa ban pynduh noh ia ki interview shimet, une u Chairman ka MPSC ula ong “Ha ki por ba la leit haba ki nongapplai kam ki dang duna, ia kiba bun ki kam la thung da kaba leh ia ki interview shimet hynrei mynta bala bun ki nongapplai kam, ngim lah shuh ban leh ia ki interview shimet”.
“Hynrei lada ngi dei ban pynduh noh ia ka interview shimet, ngin hap ban pynkylla ia ka rukom thungkam. Ia mynta hi ngi la bud ia ki ba bun ki kyndon pynlong eksam ka UPSC bad ka interview shimet bad ki marks bala ai -bad ka MPSC kam don bor satia ban leh ia kane bad ngin ym leh hi ruh”.
U Bah Marwein ula ong baka kyndon ba kongsan eh ha ka jingjied ia kiba iohkam ka shong eh ha ka jingpass shakhmat jong ki ym da kiwei kiwei ki kyndon. Ula ong ia kane haba jubab ia ki jingkynnoh jong ki paidbah halor ka jingjaboh ka rukom thungkam thungjam hapoh ka MPSC.
“Baroh ki briew kin don la ka jong ka jingartatien khamtam kito ki bym pass hynrei ngi ong ia baroh ki nongapplai kam ba ngi don hangne ban leh hok ia baroh bad tang kito kiba pass shakhmat kin shah jied” ula ong.
Une u Chairman ka MPSC u pyntip ba ka Commission kala shim ia ki sienjam ban pynkylla bad pynjanai ia ka rukom treikam jong ka MPSC.
Haba kylli, u Bah Marwein ula ong ba haka jingkhein ba malu mala , ki don palat 1000 tylli ki kam kiba la dep ban pynbna hynrei ki bym pat lah ban pynlong ia ka eksam.
“Ki don bun ki kam kiban sa pynbna. Ngim shym la lah ban pynbna namar ngi dang ap ia ka roster system. Shisien ba ngi ioh ia ka roster na baroh ki Tnad, ngin sa pynmih noh ia ki jingpynbna laitkam” kular u Bah Marwein.
“Baroh shikatta, ka MPSC kala pyntreikam ia ka Reservation Policy kaba khlem ka roster system” ula bynrap.
