Shillong, Nailar 09 : U Myntri Rangbah ka Jylla Conrad K Sangma ha ka sngi Balang ula pyntip ba ka Sorkar Pdeng kan dang ban shim rai halor ki samla pule ka Jylla Meghalaya, kiba la shah ktah na ka kam iaumsnam ha Jylla Manipur.
Haba iakren bad ki Nongthoh khubor, u Conrad ula ong ba ka kynhun ba u ialam na Jylla, kala iakynduh ia u Myntri ka Koit ka Khiah bad Myntri ka kam rep ka Sorkar Pdeng ha ka jingleit sha New Delhi hynnin ka sngi.
“Ngi la tyrwa sha baroh arngut (Myntri ka Sorkar Pdeng) ba ki samla kiba pule ha RIIMS bad ha ka CAU. Imphal, lada ia ka shisnem ki lah ban ai jaka hangne ha Shillong la ka long ha RIIMS jong ka Medical lane ha kano kano ka jaka ba marjan ka thain Shatei Lam Mihngi bad ha Barapari Campus jong ka CAU, ha kaba ki samla pule Agriculture ki lah ban leit shah hikai ba shisnem” ula ong.
U Conrad ula ong “Ngi la ioh ia ka jubab kaba sngewtynnad na ki Myntri hynrei yn dang ban shim rai halor kane ka kam. Nga tharai ia ka rai un sa shim da u Myntri kam Pohiing bad kiwei ki Myntri Sorkar hynrei kine baroh arngut ki Myntri kila ai jingkyrmen bad pynpaw ba ka dei ka jingai jingmut kaba biang palat”.
Ha kajuh ka por, u Conrad ula kyntu ia baroh ba kin iatreulang bad ban wad ia ka lynti ba jai jai bad ba neh slem ha kaban pynkut noh ia ki kam iaumsnam ha Manipur.
Haba pynpaw ba kane kam dei ka por ban kynnoh iano iano ruh halor ka jinglong jingman ha Manipur, u Conrad ula ong “Lada phi iohi, ngim pat ju kynnoh iano iano ruh. Ngi shu ong ba ngi donkam ban shim ia ki sienjam. Ka dei ka kam kaba bun jyrwit jyrwat bha. Phi hap ban sngewthuh. Ka long kaba suk ia phi ban kynnoh hynrei ka long pat kaba donkam ban sngewthuh ia kaei kaba don ha lynter ba kumno kine ki jingjiaki jia”.
