Shillong, Rymphang 26: U Myntri Rangbah ka Jylla Conrad K Sangma ula pyntip ba ki Pulit kin pynlong mynta ka sngi Nyngkong ia ka jingtohkit ban lap ia ki daw tynrai halor ka jingpluh ding, kaba bamduh ia ka jingtei ba 111 snem jong ka Shillong Bar Association myn ha ka miet 24 tarik Rymphang.
Ha ka kyrwoh bala wanrah hapoh ka Iingdorbar, u Conrad ula ong “Ki jingpynjulor ia ki jingdon jingem, ki kot ki sla bad ki daw tynrai jong ka jingpluh ding yn dang bishar bha ha ka jingtohkit ka ban long ha ka 26 tarik Rymphang bad ia ka kaiphod ba bniah, yn sa aiti sha ka Sorkar Jylla”.
Ula pyntip ba ka District Magistrate ka East Khasi Hills kala thung ia ka jingtohkit Magistrate halor kane ka jingjia pluh ding.
U Myntri Rangbah ula iathuh ba ki Pulit kila ioh khubor na ka Control Room, Shillong ha ka por 22.15 baje eiei ha ka miet 24 tarik, ba pyntip ia ka jingpluh jong ka jaka treikam jong ka Shillong Bar Association, kaba don ha lyndet ka Ophis ka DC, East Khasi Hills, Shillong.
Halor kane, ka kali pynlip ding ba nyngkong na Barabazar F&ES kala mih ha ka por 22.16 baje bad ka kali kaba r kala mih ha ka por 22.20 baje. Haba poi ha kane ka jaka, la shem ba ka jingtei baroh kawei kala kem ding. Namar kane, la wanrah ruh ia ki kali pynlip ding na Shillong F&ES bad na ki Fire Station kiba don marjan.
Hadien ka jingpoi u IGP (F&ES) Meghalaya, Shillong, la shim jingkhein ia ka jinglong jingman naba ka ding kala klang bha bad buh jingma ia kiwei pat ki jingtei jong ka CJM Court, PHQ, Engineering Wing ka PHQ, bad hapoh 4 kynta ka jingiakhun, la lah ban tem ia ka jingpur jong ka ding.
U pyntip ba haduh 6 tylli ki kali pynlip ding kila iakhun ia ki thylliej ding bad artylli ki kali kit um jong ka Shillong Municipal Board (SMB) kila wan ban iarap lang. Kumba 45 tank ka um la pyndonkam ha ka jingiakhun ia ka ding.
“Kat kum ka jingtohkit ba malu mala, la suba ba ka jingpluh ka lah ban dei na ka bording elektrik” ong u Myntri Rangbah haba bynrap ba kat kum ka jingiathuh u peon jong ka Shillong Bar Association, ula iohi ia ki waiar elektrik kiba la um bad noh rynjub. Hynrei, ym nang pat ban ong ia ka jingkhein sting jong ki briew ba treikam ha kane ka Ophis.
Ula bynrap ba ha ka jingtohkit, la shem ba ym shym la don satia kano kano ka jingjia ba sngewsih ne jingmynsaw na kane ka jingpluh ding.
La pyntip ba u Myntri Rangbah, u Symbud Myntri Rangbah ba khmih ia ka kam pynroi sor, u Chief Secretary, u DGP, ka DC, u SP, kila iapoi sha kane ka jaka ban khmih ia ka jinglong jingman ha kane ka miet ba pluh kane ka jaka treikam.
