Shillong, Nailur 02 : Ka Shillong Government College of Engineering ha Mawlai Kynton Massar, ka dang ap ban ioh ia ka jingmynjur jong ka AICTE ban sdang noh ia ka jingshim klas.
Ka Academic Council jong ka NEHU kala ai ia ka provisional affiliation ban ai jinghikai ia ka B.Tech courses, ong ki khubror ba iajan bad ka Sorkar.
Ban lah pynlong ia ka Engineering College kaba treikam pura, ka Sorkar kala phah ktien ia ka jingmynjur ban aiad ia u Additional Director & Principal ka Shillong Polytechnic, Mawlai bad 13 ngut ki Nonghikai ka Shillong Polytechnic, kiba biang kyrdan ban bat ruh ia ka kam kum ki Head jong ka Institute ban long kum ki Nonghikai jong ka Engineering College, kila ong.
Ka jingtei jong ka Academic Block, ki hostel jong ki kynthei bad shyrang, ki dei kiba la dep pyntrei bad la dep ruh ban plie paidbah da u Myntri Rangbah ka Jylla ha ka 1 tarik Kyllalyngkot, 2023.
Ka jingshna ia ki surok ha campus bad ka jingpynbiang ia ki bording elektrik bad ka umbam mdih hapoh ka campus jong ka Shillong Government College of Engineering ruh ki dei kiba la dep pyntrei lut.
Ka Sorkar Jylla kala pynkha haduh 55 tylli ki kam hikai bad ki nongtrei na ka bynta kane ka College.
