Shillong, Naiwieng 10 : U Superintendent of Police ka East Khasi Hills Bah Vivek Syiem, ula pynpaw ba kam don satia kano kano ka jingpynbor ban pyllait noh ia ki nongialam ba shah kem jong ka Meghalaya Commercial Truck Owners & Drivers Association (MCTODA).
Ki nongialam ba shah kem ha ka jingjia ha Lad Mawryngkneng, kila shah pynngat ha ki saw tylli ki case, kynthup ka jinglun maw bad jingpynjulor ia ki trok.
Ka rai ban ai bah jamin kan shong eh ha ka IIngkashari, ong u bah Vivek haba iakren bad ki nongthoh khubor ha ka sngi Nyngkong.
“Ki nongialam ki dei ki briew kiba don hakhmat eh ha katei ka jingiakhih bad ha ka por ba leh ia baroh kine ki kam bymman hangtei, ki dei kiba don hakhmat duh” ula ong haba bynrap ba ka ain kan iaid hala ka jong ka lynti.
U Bah Vivek ula batai ba ki briew ka MCTODA kila shah maham ha ki magistrate ba don ha ka kam ba kim dei ban pynthut ia ka jingiaid ki trok, hynrei kila jied pynban ia ka lynti ban lun maw, kaba pynbor ia ki Pulit ban bom da ki lathi.
Une u Heh Pulit ula kyntait ia ka jingkynnoh ba leh palat pud ki pulit bad onng ba kaei kaba ki Pulit ki leh ka long kaba leh tang ban pynneh ia ka shongsuk shongsain.
“Ia ki briew ba don hangtei la pyntip na u Magistrate ba kim dei ban pynthut ia ka jingiaid ki trok bad la kren shai bha sha ki hynrei haba ki trok ki wan bad la synran ia ki, kala mih ka jinglun maw kaba shyrkhei bad ka jingshoh ia ki nongniah trok, la don ruh u briew ba shah rahbor bad kaei kaba jia ka long ba kala don ka jingkulmar kaba shyrkhei ha kaba ki Pulit kila hap ban pyndonkam ia ki lathi, kam dei ba ngi pynkhein ia ki kyndon ain bad kam shym la don ruh ka jingleh palat pud na ka liang ki Pulit” ula ong.
.){kind=link}