Shillong, Risaw 29 : U Chairman ka Regional Committee ka West Khasi Hills, Bah Paul Lyngdoh ula pyntip ba ka Committee ka dang ap ia ka jubab na Assam ban pynlong ia ka jinghiar jurip lang ia ki jaka ba don hapdeng ka jingiakajia pud ha thain Langpih.
Kat kum ka jingong jong u, ka Committee kan sa aiti ia ka kaiphod ba khatduh sha ka Sorkar Jylla tad ynda la dep ban pyn long ia ka jingiajurip lang bad ka Assam ia ki jaka ba don hapdeng ka jingiakajia.
Haba iakren bad ki lad pathai khubor ha ka sngi Ba-ar, u Bah Paul ula ong “Ngi la pyrshang ban iakren bad ka Committee na Assam. Nga la bthah ruh ia u Deputy Commissioner ka West Khasi Hills ban iakren bad u Deputy Commissioner ka Kamrup hynrei haduh mynta ngim pat ioh satia ia ka jubab kaba biang. Kam pat don sati aka jubab ia ka jingpyrshang jong ngi ban lah pynkut noh ia kane ka kam”.
“Ngin sa aiti ia ka kaiphod ba khatduh tad ynda ngi la dep wan jurip ia ki jaka ba shah ktah. Ngi la aiktien ban pyndep noh ia ka kam ha kane ka tlang 2024. Mynta ngi dang ap ia ka jubab na ka Sorkar Assam” ula bynrap.
Haba kylli, u Myntri ula ong ba ka Regional Committee ba u khlieh kala dep ban ai ia ki kot ki sla sha Assam ban pynshisha ia ki jingkam jong ka Meghalaya ia palat 54 tylli ki Shnong kiba hap hapoh ka Langpih Sector ha ka jingialang ba long khatduh eh ha Hotel Pinewood.
“Ngi la dep aiti ia kine ki kot ki sla. Ka jubab ka long kaba biang bad ngi donkam ban pyndep satang ia kawei ka kam, kata ban leit jurip ia ki shnong ba shah ktah, khnang ba ngin lah ban iakynduh ia ki nongshongshnong jong kine ki jaka. Dei tang kane ka kam kaba sah, kaba ngin dang ban pyndep” ula ong.
La ka jingiashim ia ai markylliang kan treikam ha kaban pynbeit ia ki jingiakajia, u Bah Paul ula ong “Ngan nym ai ka jingia shim ne ia ai namar baroh kiwei kiwei ki shong ha ki kyndon, kiba ngi la dep ban ithuh kum ka histori bad kiwei kiwei”.
