Shillong, Nailur 06: Ki Pulit ka East Khasi Hills District, kila ioh dain kuna haduh T 13.35 lak na ki 1788 tylli ki kali kiba la shah bat ba ki tah iit iong, ha Nongbah Shillong.
Haba pyntip ia kane ha ka sngi Thohdieng, u Superintendent of Police ka East Khasi Hills Bah Sylvester Nongtnger ula ong “Khnang ban bud bad pyntreikam ia ka hukum ka Iingkashari Supreme Court, ki Pulit ka Shillong Traffic (STP) kila pynlong ia ka jingbat ia ki kali tah iit iong bad ioh bat haduh 1788 tylli bad dain kuna haduh T. 13,35,000 kaba long tang naduh ka 1 tarik Naitung haduh 6 tarik Nailur”.
“Nalor kane, kila tar ruh ia baroh ki film iong bala tah ha kine ki kali hadien ka jingdain kuna” ula ong.
Haba kylli, u SP ula pyntip ba na ki 1788 tylli ki kali ba ioh bat, 30 tylli ki dei ki kali Sorkar.
Kat kum ka jingong jong u, ka Iingkashari Supreme Court ha ka hukum halor ka mukotduma b aka bishar, kala mana ban tah iit iong kam pher ia ka percentage ba iohi shapoh ne Visual Light Transmission (VLT) ha ki safety glass, windscreen (nakhmat bad nadien) bad ki jingkhang.
“Namar kane, ka STP kala kyntu ia baroh ki trai kali ba kin kiar na ka jingtah iit iong ha ki safety glass, windscreen bad ki jingkhang jong ki kali bad lada kila dep tah, sngewbha ban weng noh ia ki” ong u SP haba bynrap b aka jingbat ia ki kali ba tah iit iong kynthup ruh ia kiwei ki jingpynkhein ia ka MV act kan iai bteng bad yn leh tyngeh pyrshah ia ki nongpynkhein.
Nalor kane, u SP ula pynshai ruh ba kat kum ka jingbthah, tang kawei ka kali jong u Myntri Sorkar ne MLA la shah ban tah iit iong.
U ong ba ka Committee kala don ban shong bishar ia ki jingkyrpad ban pyllait na ki kyndon ba khang ia ka jingtah iit iong ha ki kali. Ula ong ba ia kane ka committee la pynbna ha ka 21 tarik Jymmang, 2012.
