Nongpoh, Jymmang 23: Ha kawei ka jingjia shah lute, kawei ka jaka tih maw lane ka stone crusher kaba don ha ka shnong Umbuda ha ka thain Killing, Ri Bhoi District ka la shah lute ha ki briew ki bym lah ban ithuh durkhmat kiba la kieng da ki suloi dieng.
Kane ka jingjia ka la jia ha ka por 1 baje eiei mynstep jong ka 23 tarik u Jymmang.
Katkum ka jingtip ba la iohlum na ki bor pulit na Khapmara Police Station, la pyntip, ba ha kane ka step, ki pulit ki la ioh jingtip halor ka jinghiar thma ki briew kiba la phong jain shipai (camouflage) bad ba kit ia ki suloi dieng, ia kawei ka karkhana tylliat maw ha Umbuda.
Lah iathuh ba ha kane ka jingjia, kine ki briew kila byrngem byrsit ia ki nongtrei ha kane ka karkhana bad kila ioh ban rong tuh haduh T.80, 000.
Ki Pulit kila register case halor kane ka jingjia bad ka jingthwet ia ki briew ba donkti kala iaid shakhmat.
