Guwahati, Risaw 20 :Ka sorkar Assam kala shim ia ka rai ban ai sngewbha da ki scooty sha kito ki khynnah pule kiba wan shakhmat ha ka eksam higher secondary kaba la dep.
Kito ki ban ioh pdiang ia kine ki ar shaka ki kynthup ia 29,748 ki khynnah kynthei kiba wan ha ka kyrdan first division bad 6052 ki khynnah shynrang kiba ioh 75% shaneng ha kane ka eksam ba la dep.
Baroh ka jinglut jingsep ia kaba yn bei da ka sorkar Assam na ka bynta ban sam ia kine ki kali ar shaka kan kot sha kumba T. 259 klur.Ia kane ka rai la shim ha ka jingialang jong ka kynhun myntri ka Assam hynnin ka sngi Balang.
La iohi ba kane ka sienjam ba la shim da ka sorkar Assam kum ka dak jingpynshlur bad ai mynsiem ia ki khynnah pule ba kin lah ban lehbha ha ki eksam higher secondary.
Nalor kata ka jingsiew kaba man u bnai na ka bynta ki assistant professor kiba ioh beit tang kawei ka jingsiew hapoh ki kolej ba la ithuh da ka sorkar yn kyntiew sha ka T.55,000.
Shuh shuh ka kynhun myntri ka Assam lala shim ruh ia ka rai ban tei ia ka hotel hapoh Kaziranga, ia kaba yn pyntrei da ka Saraf Hotel Enterprises (Hyatt Group of Hotels).
Ka jingshim rai jong ka kynhun myntri ha kaba iadei bad ka jingtei ia ka hotel hapoh Kaziranga ka long shi bynta ban kyntiew ia ka kam jngohkai pyrthei.
