Nongstoiñ, Risaw 4: Ka jingїaseng Samla jong ka Umyiap District kan sa rakhe їa ka Jubilli rupa ha ka taїew ba ar jong u bnai Naiwieng ban wan.
Kumta ka jingpynkhreh їa ka jingrakhe їa katei ka Jubilli rupa, mynta ka sngi ka la sdang da ka jingїalehkai sport ha madan riewblei kaba don ha pdeng jong ka pyntha Umyiap.
Ïa katei ka jingїalehkai la plie da u bah Pulstar Nongsiej u ba la shah khot kum u kongsan, ha ryngkat ka jingїadon lang jong ki nongkitkam jong ka jingїaseng Samla District, u Pastor D.R.Marngar bad u Pastror S.K.Kharsyntiew, kiba dei ki Pastor Incharge jong ka District.
U bah P.Nongsiej haba kren kum u kongsan, u la ong ba ka jingpynlong jong ka Jingїaseng Samla Umyiap District їa katei ka jingїalehkai sport, ka long kaba don kam haduh katta katta namar ki samla kiba pynleit jingmut ha ki jingїalehkai sport ki kham lait na ki kam sniew.
Nalor kata u la ong ruh ba ka jingїalehkai sport ka pynkhuid їa ka jabieng bad ka pynkhlaiñ їa ka met ka phad bad ki samla kiba don їa ka jabieng kaba khuid bad ka met kaba koit ba khiah ki khlaiñ ruh ha ka kam shakri Blei.
U la kyntu ruh їa ki samla bad ki nongїalam jong ka Jingїaseng Samla District, ba kin pynmlien barabor ban minot ha ki jingїalehkai sport, khnang ba ki jingmut jingpykhat jong ki kin long kiba khuid .
Ha katei ka jingїalehkai sport ki samla shynrang bad kynthei na ki khyndai tylli ki Balang, ba kynthup їa ka Jingїaseng Samla Balang Presbyterian Umyiap, Lumpyngngad, Sohpian, Nongspung, Ksehkohlong, Mawїawet, Mawlyngkhar, Lawrapha bad Mawsngapwir ki la wan ban їashimbynta shitrhem naduh ka sngi ba sdang. Nalor kata їa ka wat ka ba ar yn pynlong ha ka hynriew tarik, kaba dei ka sngi palei ha katei ka juh ka madan bad ha katei ka sngi palei ka jingїalehkai kan sdang naduh ka por 8.30 baje mynstep.
Na ka liang ki nongpynїaid їa katei ka jingїalehkai sport, ki la kyntu їa baroh kiba wan ban їashim bynta ba kin poi ha madan ha ka por ba biang, khnang ba yn lah ban pyndep їa baroh ki jingialehkai ha ka por kaba biang. Kawei pat ka bynta kaba ka Jingїaseng Samla Umyiap District ka la pynkhreh shuwa ban rakhe їa ka Jubilli rupa, ka dei ka Mini Gospel Concert kaba yn pynlong ha ka Balang Presbyterian Sohpian. Ka kynhun ka ban ai jingrwai bad tem ka dei ka Zamar Voice ka kynhun tem jong ka Jingїaseng Samla Balang Presbyterian Ksehkohlong.
