Nongstoiñ, Nohprah 11: ‘Ka kynhun ïarap ïa kiba donkam eh’ hapoh ka jingïalam u Bah Lumlang Kharsyiemlieh bad Bah S Marbaniang ha ka sngi saitjaiñ, ka la hiar sha ki thaiñ Lai Lyngdoh ban ïarap sngewbha da ki jaiñ kup thiah shuwa ka Khrismas.
Ka jingthmu jong kane ka kynhun ka long katkum ka phang pdeng kaba ong, ‘To Hikai ïa ka ban leh bha’ kaba la pynshong Nongrim na ka Kitap Isaïah 1:17.
Ha katei ka sngi, ka prokram sam jaiñ kup thiah ba nyngkong la leh ha Jaidoh Youth Centre ha ka por 1 baje noh phai sngi, ha kaba la ïoh ban sam na ka bynta 58 ngut, kata na ka shnong Jaidoh, Mawthungkper bad Nongrim Mawkhar.
La pynïaid ïa ka jingïalang ba lyngkot da u Bah D.Nongkseh Secretary Shnong Jaidoh, la pynlong jingduwai bad la ïoh jingkren na u Sordar Shnong Jaidoh Bah T.Nongkseh bad Bah K.Nongdkhar Mawthungkper kiba la sngewnguh ïa ka kynhun kaba phai khmat lem ïa ki duk ki Rangli ha thaiñ.
Hadien kane la pynlong jingïalang ha dorbar hall Mynni mawbri ha ka por 2:30 nohphai sngi bad la ïoh ban sam na ka bynta 30 ngut na ka shnong Mynnimawbri, Mawsnarieh bad Mawshongkhyndew. La pynïaid ïa ka jingïalang da u Bah K.Shangoi Sordar Shnong Mynnimawbri ryngkat ki jingduwai, nangta la ïoh jingkren na u Bah K.Sohshang Secretary Shnong Mawshongkhyndew u ba la sngewkmen eh ban don ki kynhun sngewlem ïa ki shnong ba duk ba jynjar.
U Bah Lumlang Kharsyiemlieh u nongïalam ka kynhun u la pynkynmaw da kaba ong, “Ngi dei ki khristan kumta ngi pynshong nongrim kumba ong ka Bible ba ka jingngeit khlem ka jingleh isynei kam don dor ei ei ruh. Ngi pyrshang, ka jingsngewlem khlem da ïarap ïa kiba jynjar kam ïarap ei ei. Ka kynhun ka ngeit kumba u Jisu u wan da jingsngewrit ha ka Khrismas, ngi ruh kum ka kynhun ngi wan bad phi namar ngi ïa wan na ki longïing kiba jynjar ba duk”.
Ha katei ka sngi la donlang ki nongïalam Shnong bapher bapher, ki samla Rangbah ka thaiñ bad ki paitbah kiba la wan sakhi lang.
