Shillong, Nailur 25: Kum shi bynta ban lait naka jingsakhut kali ba jur ka jingdheng kali ha sor Shillong, u Chief Executive Member (CEM) ka Khasi Hills Autonomous District Council (KHADC) bah Pyniaid Sing Syiem ula ialam nuksa ia kiwei pat daka ba wan shaka Dorbar Kyrpang ka Council daka arshaka lane ka Bike bad ula kyntu ruh ia para MDC ban wad ia kiwei pat ki lad ha ka leit ka wan nalor ka kali.
U CEM ula ai jingmut ia kiwei ki MDC ban pyndonkam da ki arshaka bad ieh iaki kali ha ïing haka por ba ki wan sha ka Dorbar ban lap iaka por.
Kum ban pyni nuksa, u bah Pyniaid ula wan sha ka Dorbar kypang jong ka KHADC da ka ar shaka ban lait naka jingdheng kali.
Haba kren ha kane ka sngi u bah Pyniaid ula pynpaw ka jingsngewhun halor ka rai ba ula shim bad kdew ba kumno kane ka arshaka kala pyllait ia u naka jingdheng kali bad ula poi shaka Dorbar haka por kaba biang.
“Nga sngewkmen ba nga wan daka arshaka. Ka iarap ia nga ban poi sha ka Dorbar haka por ba biang bad nga kyntu ruh ia kiwei ki MDC bad ki nongtrei ka KHADC ba kin wad lad kumno ban pyndonkam noh daki arshaka haka jaka ki kali heh ban lait naka jingdheng kali” ong u bah Pyniaid.
