Nongpoh, Risaw 22 : Ka Ri Bhoi District Cricket Association lem bad ka Seng Samla Shnong Umran Niangbyrnai, kin pynlong ia ka Talent Hunt ban sei pyrthei ia ki khynnah donsap ha ka kam ialehkai cricket bad ban ai ha ki ia ka rynsan ba kin paw pyrthei.
Ia kane ka talent hunt yn pynlong ha madan ialehkai jong ka shnong Umran Niangbyrnai ha ka 26 tarik Risaw naduh ka por 9 baje mynstep.
U Bah Rayonald Kharkamni, President ka RBDCA, u la pyntip ba ia kane ka talent hunt yn pynlong kyrpang na bynta ki khynnah kiba hapdeng 10 snem haduh 16 snem na bynta ki kynthei bad shynrang.
Ha kane ka talent hunt yn wan ban peit bnaih da ki coach kiba la pass ia ki course jong ka BCCI ba kynthup ia u Bah Badonnam Mylliemngap ( Level O coach), u Laxman Gurung (Level O coach) bad u Shankar Newar (BCCI Level 1 Coach).
Ka RBDCA ka khot ia ki khynnah kiba donsap ban ialehkai cricket ba kin wan wan shimbynta ha kane ka talent hunt.
