Shillong, Risaw 24: Ka Skulbah North-Eastern Hill University, ha ka lah sngi u Blei, kala pynlong ia ka jingia phylliew jingmut bad ka kynhun kaba na ka Ri Croatia ha Auditorium jong ka Kiang Nangbah NEHU Old Guest House bad katei ka kynhun na Croatia kala pyninam ruh iaka Sword Dance ha kane ka sngi.
Katei ka kynhun jong ki 16 ngut ki Knight`s Association Kumpanjija“- Blato (Croatia) kila wan jurip ia ka NEHU, da ka jingthmu ban iaphylliew bad ban iasam mar kylliang ia ki jingtip bad ki bor pyniaid bad ki samla pule jong katei ka skulbah.
La iathuh ba ka jingthmu jong ka jingwan jurip ka jong katei ka kynhun na Croatia ka long ban pynsngewthuh bad ban pynshai paidbah shaphang ka Folklore Festival bad Cultural Heritage jongka Blato, ka dewlynnong jongka Korčula, Republic of Croatia, kaba dei kaba la bna nam iaka jinglong kyrpang ka mariang sawdongsawkun, ka kolshor, ka histori bad ka bam ka dih kaba don ha ka jaka pdeng jongka Central bad Southeast Europe.
U Nongialam jongka Knight’s Association Kumpanjija – Blato na Croatia u Nicola, ula pynpaw ia ka jingsngewtynnad ia ka jingpdiang sngewbha jong ka NEHU bad khamtam ia ka jingiaphylliew kaba don jingmut.
Ula iawer ia ki bor pyniaid jong ka NEHU ryngkat bad ki samla pule ba kin leit jngohkai iaka ri Croatia ha ki snem ban wan.
U Vice Chancellor ka NEHU Prof. PS Shukla, ula pyniaid ia katei ka prokram bad ula ai khublei ia katei ka kynhun jong ki 16 ngut na Croatia kiba la wan jngoh iaka NEHU ban pyni kyrpang iaka Kumpanjija Sword Dance, kaba dei ka shad tynrai kaba pyni iaka mynsiem jong ki nongialeh kiba ieng ban iada ia ka dewlynong pyrshah ia ki nongshun ha ki por kiba rim ba jah.
Katei ka waitlam kadei kaba pyni iaka bor, jingshlur, jingkhlaiñ, ka jingiada bad kumta ter ter bad ia katei ka Sword Society la seng naduh u snem 1927.
Katba u Prof. B. Panda, Director ka ICSSR-NER bad u N. Munish Singh, Zonal Director, ICCR, North-East kila ai jingkren bad pdiang sngewbha ia katei ka kynhun kaba la wan jngoh iaka skulbah NEHU.
