Shillong, Risaw 4: Ka Northeast Frontier Railway (NFR) kan pynlong iaka Northeast Half Marathon halor ka jingkieng Bogibeel, Dibrugarh Assam ban pyninam iaka jingkieng rel kaba jrong tam hapoh ka ri India.
Kane ka Half Marathon yn pynlong haka 29 tarik Risaw naka bynta lai tylli ki Category kata ka 21.1 km, 10 km bad 5 km.
Lah ban kdew ba iaka NE Half Marathon la pynlong ruh hapoh Darjeeling bad Guwahati.
Haba kren sha ki lad pathai khubor u Captain Rahul Sudesh Bali u nongpyniaid iaka NE Half Marathon ula ong “Ka thong jong ka Half Marathon kadei ban pyninam iaka jingkieng Bogibeel ha baroh kawei ka pyrthei bad iaka jingiakop mareh yn pynlong ha lai tylli ki Category bad ki nongmareh na kylleng ka pyrthei kin wan shim bynta”.”
“Haka NE Half Marathon bala pynlong ha Darjeeling bad Guwahati, Ngi la sakhi ka jingwan shim bynta 7000 tam ki nongmareh. Ngi kyrmen ba ha kane ka kynti ruh ki paidbah kin wan shim bynta bad kane ka jingiakop mareh kan iarap ban kyntiew iaka kam jngohkai pyrthei bad ka kam khaii namar ka jingkieng Bogibeel kadei kawei ka jingtei bala tei halor ka wah Brahmaputra ban pyninam iaka jingitynnad ka jaka” ula ong.
Nalor kane u la ong “Ki nongwan shim bynta ha kane ka jigniakop mareh kin kynthup ki briew na Nigeria, South Africa, Ethiopia. Ka roi ka par jong ka thain shathei lammihngi kan ioh jingmyntoi bha na kane ka jingiakop mareh”.
Naka liang u myntri khynnah ka sorkar pdeng ba khmih iaka tnat Petroleum and Natural Gas u Rameswar Teli ula ong “Hapoh ka jingialam u myntri rangbahduh ka ri u Narendra Modi, la sdang iaka Fit India Movement bad ka Half Marathon yn pynlong ha Dibrugarh halor ka Bogibeel Bridge. Lyngba kane ka rynsan iakop mareh yn lah ban kyntiew iaka thain shathei lammihngi bad kane ka jingiakop mareh kadei lyngba ka tnat NF Railways haka jingiatreilang bad ka tnat Petroleum and Natural Gas”.
“Kane ka Half Marathon kadei ka sienjam jong u Narendra Modi uba la iohi jngai lyngba ka Fit India Movement bad kane ka rynsan kan kyntiew iaka kam ialeghkai jong ki paidbah ka thain shathei lammihngi” ula ong.
