Shillong, Jymmang 23: Ka tnat social welfare bad ka tnat police kan iathir sani bha halor ki sienjam thymmai ba dei ban shim haba iadei bad ka jingiakhun pyrshah ia u drok hapoh ka Jylla bad ia kane yn iakren haka jingialang jong ka state level meeting jong ka Drug Reduction Elimination and Action Mission (DREAM) haka taiew ban wan.
U Myntri ka tnat Social Welfare u Bah Paul Lyngdoh ula ong ba iaka jingialang yn pynlong haka 28 tarik mynta u bnai haka jingdon lang ka Director General of Police (DGP) lem bad ki heh ophisar ka tnat pulit bad ka social welfare.
“Ngi la ithuh iaki jingduna bad ki jingdkoh hapdeng ki kam ba leh da ka tnat social welfare bad ka tnat pulit. Ia kine baroh yn sa iakren bha haka jingialang ka ban long haka 28 tarik mynta u bnai” ula ong.
Haba kylli, u Myntri ula ong “Ka jingialang kan long kaba kongsan bha namar ngi pyrshang ban wad shuwa ia kaei kaba iahap jingmut lang bad ka tnat Police. Mynta ngi la ioh DGP thymmai bad hadien ka jingweng iaka MCC ngin ioh Mission Director jong ka DREAM”.
“Namar kata, ngin sa shim ia ki sienjam kiba thymmai halor ka jingiakhun iaka jingjyllei u drok hapoh ka Jylla. Ngin iakhun daka ba tyngeh kat kaba donkam bad hadien ka jingialang la sngi ba-ar bad ka tnat Pulit, ka ban ngin iashim rai lang ia ka lynti ba dei ban shim bad ngin sa pyniadonbynta lang ia baroh ki MLA hapoh ka Jylla ban iakren ha man ki district” ula ong.
Haba kylli hato ka Sorkar kan iarap pisa ne em ban sumar iaki ba kyrni drok lyngba ka DREAM project khamtam ia kito kiba wan naki longing ba duk, u Bah Paul ula ong “Ngin sa bishar halor kane hynrei haduh mynta ngi la mang T.4.5 klur ban pynlut haki prokram bapher bapher haka lynti ban pynduih jait ia u drok ha Meghalaya.”
“Iaka jingkylli, kan dei ruh kawei ka mat ba ngin iakren haka jingialang ka ban long haka taiew ban wan, Ngin iatreilang ruh bad ki kynhun treimon sngewbha, ki self-help groups, ki kynhun sengbhalang ha kaba ngin kyrpad ia ki ia ka jingkyrshan ba kin mih shakhmat bad ngin sa iarap pisa ba kin iarap lang ia ka Sorkar Jylla haka jingiakhun pyrshah ia u drok” ula ong.
Haba iadei bad ka jingrem palat ki rehabilitation centres, u Myntri ula ong baka Sorkar ka kwah ba ka DREAM project kan dei ka community oriented programme lane ka prokram ban iatreilang daki Shnong ki thaw.
“Ngi kwah ba kan long kum ka community oriented programme kumba ka long ha Mawlai Town Dorbar. Kino kino kiba shah sumar hapoh ka MTD kim donkam ban siew pisa katba ki dang don haka jing khmih ka MTD. Kane ka jingsumar ka dei ka bym donkam siew pisa” ula ong.
Haba iadei bad ki kyndon lane ki SOP ba pyntreikam hapoh ki rehabilitation centres, u Bah Paul ula ong “Ki don ki SOP hynrei dang donkam ban bishar bniah biang naka bynta ban pynbeit iaki jingeh kumba phi la ai nuksa”.
U Myntri ula iathuh ruh baka Sorkar kala ithuh iaki katto katne ki jaka ba jur ka jingjyllei drok hapoh ka Jylla.
 haka taiew ban wan.){kind=link}