Shillong, Nailar 21 : U Superintendent of Police ka South West Khasi Hills Bah Banrap Jyrwa, ula pyntip ba un sa buh noh da ka Anti Dacoity Camp (ADC) ha ki ar tylli ki shnong khappud ka District ban pynkhlain ia ka jingpahara bad tem ia ki kam sniew bad kam bymman khamtam ka jingwan rung ki runar na Bangladesh.
Une u Heh Pulit ula pyntip ia kane haba kren ha ka jingialang kaba la lum da ka kynhun bala phah da ka Sorkar ban lum ia ki jingtip ba bniah halor ka jingwan pyntriem dang shen jong ki runar Bangladesh ha Rangdongai bad ha Khonjoy.
Kat kum ka jingong jong u, kine ki Anti Dacoity Camp yn buh ha ka shnong Khonjoy, bad ha Rangdongai, ki ban sdang treikam noh naduh mynta ka sngi Balang. U iathuh ba ia ka Maheskhola, ki Pulit ka District kin iakren bad ki Pulit ka South Garo Hills ban iapeit lem ha ka jingpahara ia kane ka shnong.
“Lai ngut na ki runar bala ioh kem, ki dei kiba ju wan rung man ka por sha kane ka shnong. Kine ki briew ki tip bha ia ka leit ka wan bad ka jinglong jingman jong kine ki shnong bad ruh ia ki briew kiba don ba em” ula iathuh haba kyntu ia ki nongshongshnong ba kin kiar na ka jingiathuh khana eiei sha ki briew ki bym ithuh ne ki riew phylla ba wan ha shnong.
Une u Heh Pulit ula ong ba ka jingjia ba dang shen ha ka thain ka long kum ka jingpynpeit mat bad pynlong husiar bha namar kum kine ki jingjia ki lah ban jia biang hadien habud.
“Ngi dei ban long kiba husiar bha bad ngi dei ban iatreilang khnang ba ngin nym ailad shuh ba kin nang jia biang” ula ong haba kyntu ia ki paidbah ba lada ki ishankhmat ia ki riew phylla ha ki shnong ki thaw, ki lah ban pyntip sha ki Pulit da kaba phone ha u nombor 112 ba kin leh ia kaba donkam.
U Bah Jyrwa u ong ba ki Pulit ki ban don ha kine ki Anti Dacoity Camp kin iaid pahara ia ki shnong ki thaw haba ong “Lada phi lap ba kine ki Pulit ki shu iathiah sngi ne iadih buaid, pyntip wut wut sha nga ba ngan leh ia kaba donkam”.
Ula ong ruh “Ngin sa thaw noh shen ia ka Village Defence Party (VDP) ha kine ki shnong khnang ba kan wanrah ia ka jingiadei kaba iajan bad ki Pulit”.
 ha ki lai tylli ki shnong khappud ka District ban pynkhlain ia ka jingpahara bad tem ia ki kam sniew bad kam bymman khamtam ka jingwan rung ki runar na Bangladesh.){kind=link}