Shillong, Jymmang 30 : U Myntri ka Tnad Revenue & Disaster Management Bah Kyrmen Shylla ha ka sngi Balang ula pyntip ba ka Sorkar kala pyllait haduh T. 19.85 klur sha ki 12 tylli ki District ka Jylla ba kin ai ia ki lad jingiarap ba mardor sha ki lanot ba shah ktah ha ka Cyclone Remal hapoh ka Jylla.
“Baroh lang ngi la pyllait T.19.85 klur sha ki 12 tylli ki District ba kin ai jingiarap ba mar mar sha ki lanot” ong u Bah Kyrmen haba iakren bad ki nongthoh khubor.
“Ia kane ka pisa la pyllait khnang ba kin lah pyndonkam ban ai jingiarap khlem da donkam ban ap ia ki kyndon ba hap bud. Ki lah ban pyllait ia ka pisa bad sa pyndep ia ki kyndon hadien” ula ong.
U Myntri ula pyntip ba ha kane ka jinglynshop ka cyclone, uwei u briew ula iap, 5 ngut kila mynsaw bad palat 5619 ngut ki briew kila shah ktah ha ki 271 tylli ki Shnong, 910 tylli ki Iing bad ki 95 tylli ki jingtei kila julor na ka jingther u slap bad ka eriong.
Haba kylli halor ka skhim shna iing, u Myntri ula ong “Kat kum ka jingtip jong nga haba phai sha ka Housing skhim (CGI sheet) kaba ngi ioh n aka Tnad, kaei kaba ngi ioh, ngi ju ai beit sha ki paidbah”.
Ula ong ba kat kum ki kyndon, ia ki CGI sheet ym lah satia ban ai da ki Deputy Commissioner hynrei hapoh ka jingialam jong u, u sngew ia ka jingdonkam ban pyndonkam da ka pisa bala phah sha ki, ki DC ki lah ban thaw ia ki lad ki lynti kumno ban kyrshan ia ki longiing longsem bad bun sien kila ai ia ki CGI sheet.
