Shillong, Jymmang 27 : U Deputy Commissioner ka West Jaintia Hills Bah BS Sohliya, ula bthah ia baroh ki skul kynthup ki skul Sorkar bad skul shimet ba ki dei ban khang lashai ka 28 tarik Jymmang namar ka jingjur u slap bad ka eriong na ka daw ka Cyclone Remal.
“Namr ka jingsniew jong ka suinbneng na ka daw ka Cyclone Remal, kumba la batai lypa da ka IMC, ba kan wanrah ia u slap uba jur bad ka lyer kaba khlain ha ka District jong ngi, ka long kaba kongsan ban buh hakhmat ia ka jingshngain bad ka bha ka miat ki khynnah skul, ki nonghikai bad ki nongtrei jong ki skul” ong u Deputy Commissioner uba de u Chairman ka District Disaster Management Authority (DDMA) ka WJH.
Ula ong ba baroh ki skul (skul Sorkar bad skul Shimet) kiba don hapoh ka District kin khang khyrdep ha ka 28 tarik Jymmang kum ka lad jingiada ia ki jingma balah ban wanrah da ka Cyclone Remal.
Kum ki lad jingshngain, ula bthah ia ki bor pyniaid skul ban pynthikna ba baroh ki iingskul bad ki jingtei ki dei kiba skhem ban nym don ka jingshah pynjulor. Kine ki kynthup ia ki jingkhang iit, ki jingpang, ki jaka ba lait thliew, ban weng ia ki tiar kiba lah ban shah rong ha ka lyer, ban pynkynriah ia ki kot ki sla ba donkam bad ki tiar electronics sha ki jaka ba shngain.
U Deputy Commissioner ula bthah ia ki bor pyniaid skul ba kin pyntip mar mar sha ki Kmie Kpa bad ki bahaiing hasem halor ka jingkhang skul lyngba ki kor pyntip bapher bapher kynthup ki phone call, SMS, email bad ki rynsan social media.
Ha kajuh ka por, une u Khliehduh ka District ula buh ia ki helpline lada jia ba don kano kano ka jingjia ba donkam jingiarap ba kyrkieh. Kine ki kynthup ia ka – District Emergency Operation Center: 1077 bad ka District Disaster Management Officer: 7005677614.
 kiba don hapoh ka District kin khang khyrdep ha ka 28 tarik Jymmang kum ka lad jingiada ia ki jingma balah ban wanrah da ka Cyclone Remal.){kind=link}