Nongpoh, Nailur 20: Ka Confederation of Ri-Bhoi People (CoRP) kala kynnoh ba ka Meghalaya Industrial Development Corporation Ltd (MIDC) kam shym la lah pynshisha ia ka hok longtrai halor ka jaka ba ka kam kaba hap hapoh ka Industrial Estate ha Byrnihat.
Kane ka seng kala kam ia kane halor ka jingshem na ka RTI ba kala pan halor ka hok longtrai ia ka jaka ba pyndonkam da ka MIDC ha ka thain.
Haba kren sha ki lad pathai khubor, u Working President ka CoRP Bah Pateng Marsing u la pyntip ba ka seng kala wad jingtip lyngba ka RTI ia ka jaka bala kam trai da ka MIDC ha Byrnihat bad lap na ka jubab bala ioh ha ka 1 tarik Nailar, ba ka MIDC kam shym la lah ban pyni wat tang kawei ruh ka kot ka sla ban pynshisha ia ka hok long trai.
Ula ong ba ka MIDC kam shym la lah ruh ban sei wat ia ka Land Agreement, kaba la pynlyngngoh shikatdei ruh ia ka seng ba kumno kane ka tnad Sorkar ka lah ban shu kam ia ka jaka khlem ki kot ki sla ba biang.
U pyntip ba ka seng kala wan jingtip ruh na u Syiem ka Raid Marwet hynrei ka Ophis u Syiem ruh kam shym don satia ia ki kot ki sla ban pynshisha ba ka MIDC ka dei ka trai jong kane ka jaka.
Ula pynpaw ba ka seng kan nang iai buddien ia kane ka kam haduh ban da lap ia ka jingshisha.
