Shillong, Nohprah 29: Ka Plate Group Final hapdeng ka Meghalaya bad Nagaland ha ka U-19 Men’s Cooch Behar Trophy kala sdang hynne ka sngi bad ka Nagaland kala kamai 252 run bad hap 7 wiket.
Watla ka Nagaland kala jied ban tie nyngkong, hynrei ki nongkawang bol ka Meghalaya kila pynhap ia ki arngut ki nongtied kiba mih shakhmat jong ka Nangaland khlem da lah ban kamai run bad ka Nagaland kala kamai 27 run bad hap 3 wiket dnag mar ia sdang ka jingiakhun.
Hynrei hadien kane, ki nongialehkai ka Nagaland lyngba u Yugandhar ula lah ban kamai 55 run, u Seyievizo Zaputou ula kamai 77 run khelm out, u Samir Ali ula kamai 48 run.
U nongkawang bol ka Meghalaya u Avinash Rai ula shim 2 wiket bad ai 27 ha ki 11 over, katba u Angkit Tamang ula shim 2 wiket bad ai 42 run ha ki 24 over bad u Shavian Blah ula shim 2 wiket bad ai 46 run ha ki 17 over.
Ka Nagaland kan bteng ban tied biang lashai ka sngi bad ka Meghalaya kan ialeh ban pynhap ia ki nongtied dang kloi bad ban tehlakam ia ka Nagaland ba kan ym lah ban kamai 300 run.
Ka Meghalaya kala rem teng ha ka Nagaland ha ka Round Robin hynrei hadien kane, ka kynhun jong ka Meghalaya kala jop lut ha ka jingiakhun.
