Shillong, Nohprah 18: Ka Meghalaya ka la liem da lai wiket ha khmat ka Mizoram, haka lympung ialehkai U-19 Men’s Cooch Behar Trophy 2025-26 ba la long ha Anand, Gujarat.
Haba wan ban beh ia ka thong jong ka 248 ron, ka Mizoram ka la dem hi khui ban iakhun tyngeh bad ban kynjoh sha ka thong, da ka jinglah ban lam khmat u Mapuia (77), Chhuankima (67) bad Valpuia (67) na kane ka jingiakhun, kaba u sawar jong ka nam jop u la kham noh bha sha ka kynhun ialehkai ka Meghalaya.
Ban shu phai dien biang sha kane ka jingiakhun, ka Meghalaya ha ka pali ba nyngkong ka la lah ba kan kamai 219 bad pali kaba ar ka la kamai 205, ka Mizoram, ha ka pali ba nyngkong ka la kamai 177 ron bad ban wan ban beh pat ia kane ka thong ka 248 ron ha kaba ka la lah ba kan jam da kaba suk.
Da kane ka nam rem, ka pynlong ia ka Meghalaya ba kan nym lah ba kan jam sha ka phainal na kane ka thup ialehkai, kaba da kylla, ki artylli ki jylla ban iakhun ia ka nam lahduh kan long ka Manipur pyrshah ia ka Nagaland.
Na ka liang ki bowler ka Meghalaya u Mewankitbok Kharpuri (3/38), u la bteng ia la sur ialehkai kaba bha ka jong u ha kane ka samoi, hynrei ka nongrim kamai ron paralok kaba skhem bha ka la wan mih hapdeng u Mapuia bad Chhuankima, kiba la bteng ban kamai 111 ron na ka bynta ka wiket kaba lai, kaba hadien kane, u Chhuankima u la out noh ha u Namewanki Pakyntein’s (1/22).
Wat hadien u Chhuankima u la out noh, la wan ban mih bujli pat da u Valpuia, uba la bteng ban kamai 67 ron, bad sa shisien u Mapuia bad Valpuia ki la seng biang sa kawei ka nongrim kamai ron paralok kaba 71 ron na bynta ka wiket kaba saw, kaba long artad ka dak jong ka jingshah khanglad ka Meghalaya ban lah ban khur ia ka jingjop na kane ka jingiakhun.
