Shillong, Naiwieng 18 : Ka Meghalaya ka la lah ba kan pynliem ia ka Sikkim da 2 wiket, ha ka lympung ialehkai jong ka Cooch Behar Trophy 2025-26 plate group, kaba ong ha madan ialehkai jong ka MCA, Polo, hynne ka sngi Ba-ar.
Ha lyndet kane ka jingjop jong ka Meghalaya ka la wan hadien ba u Narleng (128) bad u Angkit ‘The Rock’ Tamang (35 not out), ba kin lam khmat ia la ka jong ka kynhun ban jam sha u line ka jingjop, ha kaba iaka ron kaba ka Meghalaya kan pyntikna ialade ban jop ia kane ka jingiakhun ka la wan na u nongtied (batsman) ba 10 u Apandanka Marak, kaba la wan lyngba ka boundary, hangne marsien iohi ba ka bol ka la tam shabar jong u tyllai, baroh kawei ka kynhun ialehkai ka jylla, kiba la don ha la ki jaka ba kidei ban shong wut ki la mareh beit beit shapdeng ka madan iakhun, ban ia shad ia kmen halor kane ka jingjop.
Kumban shu pynkynmaw ba ka Meghalaya ka donkam 260 ron ban jop ia kane ka jingiakhun, bad ba ka la wan ban sdang ia la ka pali ka jong ka hadien ba ka la lap ba kamai lypa 53 ron bad hap noh 3 wiket hynrei da ka mynsiem iakhun kaba tyngeh, ka la lah ba kan kot ia kane ka thong hadien ba ka la hap noh 8 wiket.
Haka sngi kaba sdang ka Sikkim ha ka pali wan tied ba nyngkong ka jong ka, ka la lah ba kan kamai tang 76 ron bad hadien kane, ka Meghalaya pat ka la lah ba kan kamai 108 ron, ha ka pali wan tied kaba ar (second innings), ka kynhun ialehkai ka Sikkim ka la ialehkai kham bha bad ba kan kamai haduh 291 ron.
Ka dawbah jong kane ka jingjop ka Meghalaya ka la wan na ka ka jingseng ia ka nongrim kamai ron paralok naka bynta ka wiket ba 6 hadpeng u Gaurav bad u Angkit, kiba la lah ban seng ia ka nongrim kamai kaba haduh 136 ron.
Ha kane ka jingiakhun ka Sikkim kam shim la treh ba kan pyndonkam da ka bol ba thymmai (new ball), ia kaba ka la iai bteng ban pyndonkam da ka bol barim, kum shi bynta ban ailad ia la ki spinner ba kin leh ia kaei kaba ka kynhun ka donkam, hynrei kane ka buit ba la pyndonkam ka Sikkim, kam shim la lah ba kan tehlakam ia ki batsman ka Meghalaya ban kamai ia ka ron kaba ki donkam ba kin jop ha kane ka jingiakhun.
Haba iadei bad kane ka jingjop, u President ka MCA u Naba Bhatacharjee, u niew bad shim ba ka long ka jingjop kaba pynkyndit, kaba kren shai ia katta ka mynsiem jong ka jingiakhun da baroh ki khynnah, kaba khlem pep kan ai mynsiem ia ka jingialehkai ha kane ka jylla.
