Shillong, Naitung 29: Ngam pat ju ioh sngew ba don kiba pyrshah iaka jingpyntreikam iaka National Education Policy (NEP) 2020 hynrei nga la ioh sngew pat ba don kiba pynsngew ba ki shem jingeh namar bun ki daw.
Ia kane la pynpaw da u Myntri Rangbah ka jylla Conrad K Sangma halor ka jingdon kiba pynpaw ia ka jingsngewdiaw ban pyntreikam noh iaka NEP naduh u bnai Nailar 2023.
“Ki daw ban pynlong iaki College ha Meghalaya ban shem jingeh ban pyntreikam iaka NEP naduh mynta u snem ki kynthup ia ka jingpynrung noh iaka jingpule Undergraduate ba saw snem, jingdonkam ki jingtei, ka jingdonkam bun ki professor bad ki tnat pule (Multidisciplinary) bad kane kan ialam shaka jingdonkam ban bei tyngka” la ong u Conrad.
U Conrad ula iathuh baka sorkar kala iakren bad ki College bapher bapher hapoh ka jylla ban iaphylliew jingmut kumno ka sorkar ka lah ban iarap ia kine ki College ban pyntreikam iaka NEP, la kadei haka liang ban bei tyngka, ban iarap iaki jingtei (Infrastructure) bad kiwei kiwei de ki jingdonkam.
“Ki College kila pynpaw ba dang donkam khambun ki Professors, Lecturers, jingtei (Infrastructure) bad dei namar kane nga ong ba ka jingkylli kam mih ba ki pyrshah ban pyntreikam iaka NEP hynrei kadei tang ba ki shem jingeh khamtam haba iadei bad ka mang tyngka” ula ong.
U Conrad ula kubur ba ki don shi bun ki College bad ki stad haka pule puthi (Academicians) kiba la ai ka jingiaroh iaka NEP daka ba ong ba kane kan iarap shisha ban kyntiew iaka Pule Puthi hapoh ka jylla bad haka juh ka por kan pynkhreh iaki samla naka bynta ka lashai.
“Ha nga shimet nga sngew skhem ba dei ban iaid shakhmat ha ka ban pyntreikam iaka NEP watla kin don shi bun ki jingeh hynrei ka sorkar kan iatreilang bad ki College ban pynurlong ia kane. Hoid ngim lah ban pynbeit lut iaki jingeh shisien leh hynrei hadien ha bud nga ngeit skhem ba ka jylla kan sa jop haba iadei bad ka jingpyntreikam iaka NEP” ula ong.
Pule ruh: Rah ka Thad Fc kum ka lahduh ha ka lympung ialehkai football ha Umsning
 2020 hynrei nga la ioh sngew pat ba don kiba pynsngew ba ki shem jingeh namar bun ki daw.){kind=link}