Shillong, Lber 20 : U Myntri Rangbah ka Jylla Conrad K Sangma hynne ka sngi nyngkong, ula ong ba ka jingdon ia ka “Jingsngew Ieid Ri” bad ka jingieid iala ki jong ki briew kan ym suhthied ne nang jur da kaba shun pat ia kiwei.
Ka jingkynthoh u Myntri Rangbah kala mih hadien ba ki 4 ngut ki MLA ka Voice of the People Party (VPP) kila mih jyndat na Iingdorkar ban pyrshah ia u Lat ka Jylla ba u ai jingkren da ka ktien Hindi ha ka sngi sdang jong ka Dorbar Mang Tyngka ka Jylla.
Pule lang ia kane : Mih jyndat ki MLA ka VPP na Iingdorbar ba ai jingkren u Lat da ka Hindi
“Nga kwah ban kren shai ba ngi dei ban kynmaw ba baroh na ngi hangne la ngi dei na kano kano ka jaidbynriew, ne ka ktien ba ngi kren, khlem peo ngi ieid iala ki jong ki briew, ngi don ia ka mynsiem ieid ri ha ngi hynrei kane ka jingsngew ieid ri bad jingieid iala ki briew kan ym suhthied tang da kaba shun ia kiwei lane ban tan shapoh ia kiwei lane ban wanrah ia kum kine ki jingkren ba phim lah ban kren ha kane ka Ktien. Kan ym pynkhlain satia ia ka jingsngew ieid ri, ka wanrah tang ia ka jingbym sngewtynnad ka bym iahap hangnp hangno ruh ha ka imlang sahlang jongngi” ong u Conrad haba iakren bad ki nongthoh khubor hadien ka Dorbar.
“Ban ieid iala ki jong ki briew ka dei kawei pat ka kam hynrei ban ieid iala ki jong ki briew bad shun ia kiwei, ka dei kawei pat ka pat ka kam. Kane kam dei ka dustur kaba ngi kwah ban iohi khamtam hapoh ka Iingdorbar Thaw Ain ka Jylla” ula bynrap.
Haba pynpaw ba ka Sorkar kala dep mynjur ia ka Resolution ban pynrung ia ka ktien Khasi bad Garo ha ka khyrnit ba phra jong ka Riti Synshar ka Ri, u Conrad ula ong “Ngi dang iai buddien ha man ki kyrdan, ngi dang iai bteng ban iakren bad ki kynhun bapher bapher ban pynthikna ba ki Ktien ki thylliej jong ngi kin kiew ha ki liang bapher bapher”.
U Conrad ula pyntip ba kila don ruh shibun ki jingiakren hapoh ka Iingdorbar ban wad ia ki lad kumno ban kyntiew iala ki Ktien ki thylliej jong ngi hapoh ka Iingdorbar ruh bad shibun ki kam kila nang jam shakhmat ha kane ka bynta.
“Ki don shibun ki lynti ban kyntiew iala ka jong ka ktien ka thylliej hynrei ban ibein ia kiwei kam dei satia ka lynti ban kyntiew ialade. Namar kata, ngi donkam ban pynthikna ba ki ktien ki thylliej jong ngi kin kiew, hooid ka long kaba kongsan ban pynthikna ba kin tynruh iala ki ktien ki thylliej hynrei kumba nga ong ba da kum katei ka rukom pyrkhat ba shun ia kiwei lane shun ia kiwei pat ki jait ktien kan ym pynkhlain ia ka jingangnud jong ngi ban pynkhlain iala ka jong ka ktien ka thylliej” ong u Myntri Rangbah.
Nalor kane, u Myntri Rangbah ula niew ia ka jingleh ki MLA ka VPP kum ka jinglehrain bad ong “…kam long satia kaba bha bad kam pyni satia ia ka jinglong ba bha jong ki Dkhot jong ngi bad ka rukom pyniaid ia ka Iingdorbar. Nga kwah ban kyrpad ia ki Dkhot ka Iing ba kin nym leh shuh ia kum kine ki kam. Ki don shibun ki lynti kiba ngi lah ban pynsngew iala ka jong ka jingsngew”.
U Conrad ula ong ba ka Iingdorbar kala mad ia ka khep ha ki snem bala leit noh ba u Lat ka Jylla um shym la ai jingkren hapoh ka Iing da ka ktien Phareng bad ka daw tynrai ka dei namar ba u Lat ka Jylla u kham duna ha ka jingnang ban kren ia kane ka ktien bad bay m lah ban kren ne pule ia kane ka ktien.
“Ka long kaba bakla ban shu rai kut ba tang namar u briew u kren ha kane ka rukom lane ha kane ka ktien (hindi) ba u ne ka, ki dei kiba niewbein ia ki briew jong ngi. Kam dei kaba dei ban pyniasoh ia kine ki artylli ki mat” ula bynrap.
