Shillong, Nailar 16: U Myntri Rangbah ka jylla u Conrad K Sangma, ula ong ba ka Inner Line Permit (ILP) bad ka kam jngohkai (Tourism) kim don jingiadei eiei ruh em bad kine ki ar tylli ki mat ki iapher bak la bak.
U Myntri Rangbah ula kren ia katei haba sngewkhia ia ka jingwan rung kyrthep ki briew kiba nabar shapoh ka jylla.
“To ngin iaka kiar naka jingpyniasnoh lang iaka kam jngohkai bad ka ILP. Ki dei ki mat kiba iapher. Ym lah pat ban len ba ka ILP kan ktah ia ki katto katne ki bynta jong ka kam jngohkai namar ka jingdonkam ban ioh iaka jingbit. Hynrei ka long kaba kongsan ban sngewthh ba ia kitei ki bynta ym dei ban pyniasohlang hajuh. Ka Kam jngohkai ka ieng kum ka bynta ban pynmih iaka khajna bad ban aikam aijam ia ka jylla. Ka jingkitkhlieh ka jong ngi kan iai bteng ban kyntiew bad ban pynbiang ia ki jingdonkam ha kaba iadei bad ka kam jngohkai bad ngin iai shimkhia bha ha kaba iadei bad katei ka jingthmu” ong u Conrad Sangma.
Watla ula ong ba ka don ka jingiapher bak la bak hapdeng kitei ki ar tylli ki mat, u Myntri Rangbah ula pynpaw ba kila don lypa ruh bun ki atiar kiban khmih iaka jingwan rung ki briew kiba nabar.
“Ka ILP ka iaid bad ki policy kiba la pyntreikam ha kiwei pat ki bynta jong ka ri bad da kaba ioh mynsiem na katei, ngi la mynjur iaka Resolution,” ula ong.
U Myntri Rangbah ula kdew ruh ha kaba iadei bad ka Meghalaya Residents Safety and Security Act (MRSSA) kaba la pyntreikam ban iaid lang ryngkat bad ka ILP.
“Nalor ka ILP, ngi la wanrah ruh iaka MRSSA act kaba la ioh iaka jingmynjur na u Lat. Ngi dang shimkhia bha ia kiba bun ki lad ki lynti ban pynurlong iaka jingthmu ban tehlakam iaka jingwan rung be-ain ki briew kiba nabar. Ban weng ia katei ka jingeh ka shong ha ka sorkar pdeng bad ngi la shimkhia ban pynbor la bunsien ia ka sorkar pdeng ai ka ingmynjur la kadei ka MRSSA ne ka ILP” la ong u Myntri Rangbah.
Pule lang ia kane: Ainam ka ICAR ia ka Guest House sha u Tirot Sing ha ka jingrakhe I-Day
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
