Shillong, Naitung 28 : U Myntri Rangbah ka Jylla Conrad K Sangma ha ka sngi Thohdieng ula ong ba ka Sorkar Jylla kan sa shim ia ka rai la kan thung ne em da ka jingtohkit ba laitluid halor ka jinghiar thma ki paidbah ia ka Chief Minister Office (CMO) ha Tura hadien ba iohpdiang ia ka kaiphod na ka Tnad Pulit.
“Ngin apshuwa ia ka kaiphod ka ban wan na ka Tnad Pulit bad hadien kane ngin sa lah ban rai kumno ba ngim jam shakhmat” ong u Conrad haba iakren bad ki nongthoh khubor haba jubab ia ka jingkylli halor ka jingdawa ka TMC ban thung ai ka jingtohkit ba laitluid halor katei ka jingjia.
“Hooid, lada donkam haba khmih ia ka jinglong jingman-lada ki Sengbhalang ki ong ba kine (briew ba pynkulmar) kim dei ki briew jong ki, kin dei kiei pat- khlem pep ka hap ban don ka rukom treikam ban lap ba kine ki briew ki dei kiei bad kaei ka jingthmu jong ki. Namar kata, hooid, ia mynta hi ka paw ba ka don kaei kaei ha lyndet bad kaba jyrwit jyrwat bha kaba donkam ban hap tohkit. Hynrei ha kane ka khep hi nga ong ba ai ba ki Pulit kin leh iala ka kamram bad ngin sa khmih kumno ba ngin jam shakhmat” ula bynrap.
U Conrad ula pyntip ruh ba un sa ap ia ka jingpynthikna ki Pulit halor ka jingshngain shuwa ban khot ia ki kynhun ba iakhih ban iakren biang halor ka jingdawa ia ka Winter Capital bad ka backlog policy, namar kane ka kam kala kylla hadien ba mih ka jingkulmar.
Nalor kane, u Myntri Rangbah ula pynpaw baka jingkem ia palat 40 ngut ki briew ka dei kaba la pynshong nongrim kat kum ki sakhi lyngba ki video jong ka jingthombor ki paidbah ym kaba pynshong nongrim na ka jingdon jingiadei bad ki seng sain pyrthei.
“Nga kwah ban kren shai, ngim shym la iaid da ki seng sain pyrthei lane pyrshang ban ong ba kane ka dei ka seng sain pyrthei lane katei ka dei ka seng sain pyrthei. Kaei kaba ngi ong ba long ba baroh kiei kiei ki dei kiba la pynshong nongrim kat kum ki sakhi satar” ula ong.
Halor ka jingkren u DGP ba kane ka jinghiar thma ki paidbhur ka dei kaba la iasylla bad iasuhbuit ban shim ia ka jingim jong u, u Myntri Rangbah ula ong “Ia kane hi tang u DGP u lah ban ong bad tang hadien bala dep ka jingtohkit ngin sa tip shai ia kaei ka jingthmu”.
Halor ka jingdawa ka TMC ban wengkam shipor ia u DGP bad SP ka West Garo Hills namar ka jingbuh ha ka jingma ia ka jingim u Myntri Rangbah ka Jylla bad kiwei, u Conrad ula ong “Ai ba ngan kren shai hangne ba ki dei ki Pulit kila iada ia nga ym kiba buh ia nga ha ka jingma. Kila don hakhmat ban iada ia nga bad ki briew shapoh kynthup ki Sengbhalang katba ki briew ba thmu ban pynmynmaw ia ngi ki don shabar”.
“Ki Pulit kila leh ia la ka kamram bad kila leh bha hi ruh. Kila buh ialade hakhmat bad kila mynsaw ruh. Kumta nga sngew b aka long kaba dei, khamtam ban mih na u Myntri Rangbah barim uba dei ban sngewthuh ia ka kamram bad jingkitkhlieh jong ki Pulit, kiba iapein bad buh iala ka jingim ha ka jingma, nga sngew ba ka jingpynrem ia ki kam dei ka kam kaba dei ban leh bad kam iahap hi ruh” ula bynrap.
Pule lang ia kane: Pynthikna u CM : Ka jingkem bad pynsajia ia ki pynkulmar ha Tura kan shong kat kum ki sakhi satar
