Shillong, Naiwieng 14 : U President ka Meghalaya Pradesh Congress Committee (MPCC) ma Vincent H Pala hynne ka sngi nyngkong ula ong ba ka jingsospon ia ki 5 ngut ki MLA ka Party kan dang iai bteng lada kim jubab ia ka shithi bala ai da ka Party.
“Ka Party ha Delhi kala sospon ia ki bad ki dang ap ia ka jubab na ki. Ngi la dep phah ia ka shithi sha ki bad ka shong haki ban jubab. Lada kim jubab, kin dang iai bteng ban don ha ka jingshah sospon tad haduh ba kut ka samoi” ong u ma Pala.
Kat kum ka jingong jong u, ka rai ban sospon ia ki 5 ngut ki MLA ka dei kaba la shim da ka All India Congress Committee (AICC) ym ka MPCC.
“Ka AICC ka dei kaba khmih ia kum kine ki kam bad ki (MLA) hap ban iakren beit beit sha Delhi bad kam don bynta eiei ruh em ka jingsospon ia kine ki MDC bad ka MPCC” ula ong.
Kine ki 5 ngut ki MLA ki dei I Kong Ampareen Lyngdoh (East Shillong), Mayralborn Syiem (Nongpoh), PT Sawkmie (Mawlai), Mohendro Rapsang (West Shillong) bad Kimfa S Marbaniang (Rambrai-Jyrngam).
Kine kila shah sospon namar ka jingleit kyrshan ia ka Sorkar Meghalaya Democratic Alliance (MDA) ba kyrshan da ka Bharatiya Janata Party (BJP).
Haba kylli, u ma Pala ula ong ba u khlem pyrshang satia ban iakynduh ia kine ki 5 ngut ki MLA hynrei hadien u sngewthuh ba kila don lynti shawei bad kam don lad shuh ban leh kumno kumno ruh.
