Shillong, Kyllalyngkot 16: Ka Alotgre Cricket Ground, Tura kan pynlong ia ka jingialehkai Cricket jong ka BCCI ha kaba ka Meghalaya kan iakhn pyrshah ia ka Bengal ha ka U-23 Col CK Nayudu Trophy 2024-25 kaban sdang ha ka 25 tarik u Kyllalyngkot.
Kadei ka jingangnud kaba la slem ia ka Meghalaya Cricket Association bad ka Tura District Cricket Association ban ioh pynlong ia ka jingialehkai Cricket jongka BCCI ha Garo Hill bad ka jingtrei shitom jong baroh kiba donbynta ha kaban pynbit pynbiang ia ka madan ialehkai kala long kaba seisoh.
La khmih lynti ba ka jingialehkai cricket ha katei ka kyrdan kan ai mynsiem ia ki nongialehkai cricket kiba na rilum Garo bad kila don bun ngut ki nongialehkai kiba na rilum Garo kiba la shah jied ha ka MCA ban mih madan ban ialehkai ha katei ka jingiakob ialehkai cricket.
Kala don ruh ka jingpynkhreh ia ki jaka shong na ka bynta ki nongpeitkai na ka bynta katei ka jingialehkai kaban sdang ha ka por 8 baje mynstep ha ka 25 tarik u Kyllalyngkot.
Ka MCA hynne ka sngi palei kala pynbna ia ka kyrteng jong ki nongialehkai kiban iashimbynta ha katei ka jingiakob bad ha kawei pat ka jingiakob kaban long pyrshah ia kaVidarbha ha Nagpur naduh ka 1 tarik u Rymphang.
Ka long kaban sah jingkynmaw haka histori ban pynlong ia ka jingialehkai ha madan Alotgre, ki nongialehkai na ka rilum Khasi-Jaintia kin hap ban wan mih ha ka mdan jong ka MCA, Polo ha ka 22 tarik u Kyllalyngkot ha ka por 6 baje mynstep ban mih ban leit sha Tura. Kito kiba na Garo Hills kin wan beit ha Tura ha katei kajuh hi ka sngi.
Ka kynhun jong ka Meghalaya ban iakhun pyrshah ia ka Bengal & Vidarbha ka kynthup ia u Kevin S Christopher (C), Manish Sharma (VC), Rohit Kr Yadav, Sachin Kumar (WK), Abhishek Kumar, Kush Agarwal, Gavineal J Marpna, Bipin Kr Ray, Josiah Momin, Swastic Chettri, Bharat Gurung, Gulgul M Sangma, PM Santhosh, Thunun Marak (WK) bad u Argeas Cham Cham Sangma.
Ki nongialehkai kiba la pynap lypa ki kynthup ia u Joydeepan Deb, Purav Agarwal, Avinash Rai, Banialam Mylliemngap bad u Navin K Rai, katba ki
Support Staff ki kynthup ia u Neetesh Sharma (Head Coach), Synrapsing Riahtam (Assistant Coach), Emidao Dhar (Physio), Skhembor Khongbtep (Trainer) bad u Chuba R Marak (Manager).
