Shillong, Kyllalyngkot 16: U Kevin Christopher ula ioh iaka Century ne kamai 100 run tam bad kane ka jingtied bha ka jong u kala pynlong ia ka Meghalaya ban tam da 210 run iaka Manipur ha ka First Inning jong ka sngi balai jong ka jingiakhun iaka U-23 Men’s Col CK Nayudu Trophy kaba la long hynne ka sngi ha Surat.
Hadien ba ula kamai 137 run pyrshah iaka Sikkim, u kapten ka Meghalaya u Kevin Christopher hynne ka sngi ula kamai 155 run na ki 238 bol ha ka jingiakhun pyrshah ia ka Manipur.
“Nga ai khublei ia u kapten Kevin uba la ioh biang iaka Century” ong u President ka Meghalaya Cricket Association u Nababrata Bhattacharjee bad ka jinglehkai bha bad ka jingiaineh bad ka jinglong rangbah bad ula long u nongialehkai cricket uba don ia ka mynsiem ban long u lawei hakajingialehkai cricket haka jylla.
U Manish Sharma ula kamai 44 run, u PM Santhosh ula kamai 51 run bad hadien ba u Kevin ula out noh ka Meghalaya kala kamai 467 run bad hap lut ki nongtied ha ka 130.4 over.
Watla ka jingiakhun kala sah sa tang shi kynta, ka Manipur kala ialeh ban pynneh beit ia ki nongtied hynrei u Manish uba la shim 6 wiket ha ka First Inning ula bteng biang ban shim 2 wiket haki 8 0ver kiba ula leit kawang bol bad ula ioh ruh ban pynhap ia u Champion uba la kamai iaka Century ha ka jingleit tied kaba nyngkong na ka bynta ka Manipur.
Kane ka jinghap noh u Champion kala ai mynsiem iaka Meghalaya ha kaba kila ioh por sa shi sngi ban pynhap lut ia ki nongtied ka Manipur katbaka Manipur pat kan pyrshang beit ban ialeh ban neh slem ki nongtied khnang ba ka jingiakhun kan kut ha ka jingiakhaid.
