Gangtok, Kyllalyngkot 11: Ka Nongkseh Sports Social and Cultural Club kala ioh rung sha ka Quarter-Finals jongka 11th All India Chief Minister’s Gold Cup International Football Tournament da kaba pynrem da 1-0 ia ka Eastern Railway FC (Kolkata) hynne ka Sngi u Blei.
U Kapten ka Nongskeh u Hardy Cliff Nongbri ula thep ia ka kol kaba ula leit shut lyngba ka Penalty ha ka kylla step, hadien ba u Khrawkupar Jana ula shah pynur ha u nongialehkai jong ka Eastern Railway.
Kane ka kol kala pynlong ia ka Nongkseh ban bteng ban ialehkai bha hynrei la sakhi pat ba ki nongialehkai ka Eastern Railway kila sdang ban leh khuid ha ka rukom ialehkai ka jongki ha kaba ar ngut ki nongialehkai kila ioh 2 tylli ki Yellow Card ha ka kylla step.
Hashwa ban kut noh ka kylla step, u nongialehkai ka Eastern Railway ula ioh sangha da ka tymbuit na ka shyntur jong u Hardy Cliff, kaba la pynlong shi syndon ia u ban sangeh ban ialehaki bad ban ialam noh sha hospital ha kaba ula shah suh arksai ha ka bynta jong ka shyntur.
Ka Nongskeh kala pynthikna kham hadien ba u Hardy u don ha ka met kaba koi tba khiah bad la pyllait noh ia u na Hospital ban leit phai sha la ka jaka sah bad ki doctor kila bthah ba udei ban bud ryntih ia ki jingbthah.
Haba phai sha ka jingiakhun ha ka kylla miet, ka Nongkseh kala iai bteng ban ialehkai bha bad watla kala ioh ia ki katto katne ki kabu hynrei kam shim la lah pat ban thep kol.
La sakhi ruh ba ka Eastern Railway kala bteng ban iakhun tyngeh ban ioh ban pyniakhaid hynrei kane kala pulom noh haba ar ngut na ki nongialehkai ki jongka kila ioh Red Card bad kila duh noh ban ialehkai.
U nongialehkai ka Nongkseh u Shano Tariang ula ioh ia ka khusnam ‘Man of the Match’ halor ka jingialehkai bha ka jongu.
Ka Nongskeh kala jop ia kane ka jingiakhun lyngba ka shi kol kaba la thep da u Hardy Cliff ha ka kylla step bad lyngba kane ka jingjop mynta kala ioh rung sha ka quarter-finals, ha kaba kan iakhun pyrshah NEROCA FC na Manipur ha ka 16 tarik u Kyllalyngkot.
 hynne ka Sngi u Blei.){kind=link}