Shillong, Naiwieng 14: Ki khynnah skul ka Jyoti Sroat School hynne ka sngi kila pyniap beij da ki sur jingrwai iaki nongwan shangkai pyngad ha Nan Polok.
Kane kadei kum shi bynta ban rakhe iaka sngi kyrpang ki khynnah lane ka Children’s Day bad haka juh ka por ban plie pyrda iaka Shillong Literary Festival ka ba dei ruh kum shi bynta jong ka tamasa Cherry Blossom Festival 2023.
Ia kane Shillong Literary Festival la plie da u Myntri ka tnat tourism u Bah Paul Lyngdoh haka jingdon lang ka Myntri ka tnat ka koit ka khiah Kong Ampareen Lyngdoh, ki khynnah bad samla pule na kylleng ki jaka pule ka nongbah Shillong bad kiwei kiwei.
Ha kane ka sngi, ka Nan Polok kala dap da ki jingpynriam itynnad, ki atall bapher bapher ban khring iaki nongwan shangkai kiba wan ban sakhi iaka Shillong Literary Festival.
Ka thong jong ka Shillong Literary Festival ka dei ban kyntiew iaka rukom iathuh khana, thoh khana, ka put ka tem bad kiwei kiwei.
Haba kren ha kane ka sngi u Bah Paul ula ong ba ka Jylla ka la dei lypa ka jylla kaba paw haki khana pateng, kum ki Mawbynna, ki krem, ki law kyntang, ki kshaid, ka put ka tem bad kiwei kiwei de.
U Bah Paul ula ong ba kaba kongsan kadei ban plie lad iaki nongthoh kot bad iaki paidbah ban pynsaphriang iaki khana pateng sha baroh kawei ka pyrthei khang ba kin lah ban wan sakhi dala de iaka jinglong kyrpang ka Jylla.
