Shillong K’lyngkot 18: Ka Nongkseh Sports Social and Cultural Club kala ioh rung sha ka final jong ka 11th All India Chief Minister’s Gold Cup International Football Tournament hadien ba kala pynrem ia ka Red Panda FC da 1–0 ha ka jingiakhun kaba la long ha Jorethang, South Sikkim hynne ka sngi u Blei.
Ia katei ka shi kol kadei kaba la ioh thep da u Sheen Stevenson Sohktung, kaba la pynthikna syndon ia ka Nongskeh kaba dei ka Lahduh ha Shillong ban rung sha ka final.
Ka Nongkseh kala pynmih ia kijuh ki nongialehkai kiba la ialehkai baroh shi katta, ha kaba u kapten u Hardy Cliff Nongbri ula wanphai biang ban ialam ia ka kynhun hadien ba ula koit la khiah bha na ka jingmynsaw.
Ha ka kylla step ka jingiakhun kala long kaba iakhaid bha hapdeng kine ki ar tylli ki kynhun bad wat hapdeng ka jingthaw ia ki lad bad ki kabu kiba biang hynrei ki nongialehkai kim shym la lah ban thep kol eiei.
Ka Red Panda FC kala ioh ia ka kabu kaba biang bha, hynrei u nongialehkai haba ula shut ia ka bol kala leit dei ia u diengkol bad kala mih noh shabar bad kane kala pynlong ia ki nongialehkai ka Nongkseh ban heh mynsiem biang.
Ka jingiakhun kala kylla hadien 10 minit shwa ban wai, haba ka Red Panda FC kala iakhun noh sa tang 10 ngut ki nongialehkai hadien ba u nongapbak ula ioh ia ka Red Card da kaba tynrah eh da ka tymbuit na ka durkhmat u nongialehkai ka Nongkseh u Khraw Kupar Jana bad ia kane ka jingjia la lap da u Linesman bad ula pyntip sha u Referee. U Khraw Kupar ula mih snam ha ka bynta jong ka shyntur hynrei ula bteng beit ban ialehkai haduh ban da kut.
Ha ka kylla miet, ka Nongkseh kala sdang ban iakhun tyngeh pyrshah ia ka Red Panda kaba ialehkai tang 10 ngut ki nongialehkai, hynrei ka kynhun ialehkai kaba na Sikkim kala sdang ban pynkhlain bha ban ym ailad ia ka Nongskeh ban ioh rah ia ka bol ne tur shakhmat ban ioh thep kol khnang ba ka jingiakhun kan iakhiad bad kumta kin hap ban iaknieh ia ka nam jop lyngba ka jingshut ia ka Tie Breaker.
U Coach ka Nongkseh u Bah Richardson Nongneng ula pynmih ia u Chesterpaul Lyngdoh ha ka jaka jong u Shano Tariang bad kane ka jingpynmih ia u Chesterpaul kala treikam ha kaba ula ioh ban pynai ia ka bol kaba biang bha ia u Sheen Stevenson Sohktung ha kaba khlem da pynlehnoh ei ula ioh thep ia ka kol kaba kongsan tam.
U Khraw Kupar Jana ula ioh ia ka khusnam ‘Man of the Match’ halor ka jingialehkai bha ka jongu.
Ka Nongkseh kan pynkhreh ban iakhun ia ka final ha ka 22 tarik u Kyllalyngkot pyrshah ia ka BSF (Jalandhar) ne Sudeva FC (Delhi) bad kine ki ar tylli ki kynhun kin iakhun ia ka Semifinal lashai ka sngi ban iaknieh ban ioh rung sha ka final.
