Shillong, Risaw 15: Ki thei ialehkai ka Meghalaya ki la shah liem noh da 12 ron ha khmat ka Mizoram, ha ka lympung ialehkai jong ka Senior Women’s T20 Trophy plate group, ba la long ha Agartala, mynta ka sngi.
Ka jingiakhun ka long ba ka Mizoram hadien ba ki la jop ia ka jingkynting pisa (toss) ki la kam trai ban tied nyngkong hynrei ki la lah ban kamai tang 74 ron na ki 19.5 over hadien ba ki la hap baroh ki wiket, haba dei ka pali ban beh ia kane ka thong, ki thei ka Meghalaya ki la lah ban kamai tang 62 ron na ki 19.1 over hadien ba ki la hap noh baroh ki wiket.
Hynrei ka nongialehkai kaba long ka shot shan ia ka Meghalaya ha kane ka jingiakhun dei ka Riticia Nongbet kiba la lah ba kan paw bha ialade ha ka bowling, ha kaba ka la ioh shwa ban khur 3 wiket naka bynta 10 ron na ki 3.5 , katba ka Solina Jaba ruh ka la ioh lem ban khur 2 wiket naka bynta 18 ron na ki 4 over, bad bynrap lang sa ka Ajima Sangma (1/7 na ki 3 overs) bad Debasmita Dutta (1/8 na ki 4).
Haba wan ban beh ia kane ka thong ka Debasmita bad ka Luiza Tamang ki la plie ia ka pali na ka bynta ka kynhun ban ban lah ban kamai 22 ron hapdeng jong ki, ha shwa ba ka Luiza kan out hadien ba ka la kamai 10 ron, bad hadien kato katne por ka Debasmita ka la out noh hadien ba ka la kamai 23 ron, kaba plie lad hi war ia ki thei ialehkai ka Mizoram ban jop ia kane ka jingiakhun, namar ki thei ka Meghalaya kim shim la lah ban seng ia ka nongrim kamai ron kaba skhem ia ka kynhun ban lah ban jam sha ka thong ka jingjop.
