Shillong, Lber 20 : Ka seng Hynniewtrep National Youth Front (HNYF) Balat Border Circle, kala byrngem ban ujor da ka mukotduma sha Iingkashari pyrshah ia kawei ka skul ha Dangar, East Khasi Hills, halor ka jingkynnoh ba ka Managing Committee jong kane ka skul, kala bam klop ia ka skhim “Mid Day Meal” ne ka jingai ja sngi ia ki Khynnah naduh u 2018.
Kane ka skul ka dei kaba la tip da ka Dangar Dombah Border Area Upper Primary School.
Haba kren sha ki lad pathai khubor, u President ka HNYF Southern Circle Bah Kyllang Shngain Thongni ula iathuh ba ia kane ka jingbam klop ia ka skhim Mid Day Meal la lap lyngba ki kot ki sla bala ioh na ka jingpan RTI halor ka jingai ja sngi ia ki Khynnah skul ha kane ka skul.
Kat kum ka jingong jong u, ka HNYF kala pan ia ki jingtip naduh u snem 2018 haduh u snem 2025 lyngba ka RTI bad na ki kot ki sla la shem ba kane ka skul la kynnoh ba kam pat ju ai ja sngi sha ki khynnah wat tang shisien ruh.
“Ka HNYF- Balat Border Circle kala leit iakynduh ia ki Nonghikai skul bad kumjuh ruh ia ki Khynnah skul-kiba la pynpaw ba kim pat ju ioh wat tang shisien ruh ia ka ja Mid Day Meal” ula ong.
Une u Nongialam ka HNYF u pyntip ba kat kum ki kot ki sla bala ioh lum na ka RTI la pyni ba ka Sorkar kala theh ia ka pisa jong ka Mid Day Meal sha ka bank account jong ka Managing Committee ka skul, kaba poi da ki phew lak tyngka.
U Bah Kyllang ula buh jingkylli ba hato ka tnad Pule Puthi ka don jingtip ne em halor kane ka kam jong kane ka skul bad ia ka pisa bala thep sha ka Account jong ka Managing Committee kaba la kot haduh T. 10 lak.
Ula daw aba ka Tnad Pule Puthi ka dei ban pynlong ia ka jingtohkit halor kane ka kam baroh bad ban pynshitom ia ki briew kiba donkti ban pynduh ia ka hok jong ki khynnah skul.
Ha kawei pat ka liang, kane ka seng kala pynpaw ia ka jingpyrshah kaba jur halor ka jingthungkam ia uwei u bar jylla ba la hikai da ki phewsnem ia ka sobjek hindi ha kane ka skul.
“Ka jingthep kam ia une u bar jylla, ka dei ka jingthungkam sop sop na ki bor ba halor namar ba ha ka joining report ruh u khlem soi” u la ong.
Kawei ka jingduh nong jong kine khynnah ba leit ban pule ha kane ka skul ka dei namar ba une u nonghikai um nang ban kren phareng (English) bad um lah ruh ban kren da kiwei kiwei ki ktien lait na ka ktien Hindi bad kane ka buh ka jingeh ba khraw ia ki khynnah namar kim sngewthuh ruh ia ka jinghikai jong u.
 Balat Border Circle, kala byrngem ban ujor da ka mukotduma sha Iingkashari pyrshah ia kawei ka skul ha Dangar, East Khasi Hills, halor ka jingkynnoh ba ka Managing Committee jong kane ka skul, kala bam klop ia ka skhim “Mid Day Meal” ne ka jingai ja sngi ia ki Khynnah naduh u 2018.){kind=link}