Hukum ia ka EC ka VPP ha KHADC ban ai sanad ia u Syiem Sohra
Shillong, Nohprah 21 : Ka seng kiengatiar bala khein be-ain-ka Hynniewtrep National Liberation Council (HNLC) kala byrngem ban siat iap bad hiar thma ia kino kino ki bor kiba thmu ban pyntroin ia ka iktiar jong ki bor synshar trai ri ka Jaidbynriew ba kynthup ia ki Dorbar Hima, Dorbar Shnong bad kiwei kiwei.
Kane ka jingbyrngem kala mih haba kyntait bad pynrem ia ka rai jong ka Khasi Hills Autonomous District Council (KHADC) ba synshar ka Voice of the People Party (VPP) ban thung ia u Myntri Mynjurlang Majaw kum u Acting Syiem ka Sohra haba kyntait ban ai sanad ia u Syiem bala jied da ka Hima.
Ka ong ba kane ka rai ka pyni ia ka jingpyrshang kaba la khein bha da ka KHADC ha kaban pyntroin ia ki bor/iktiar ba la leh kat kum ka dustur ha ka nam ba iaid kat kum ka lynti treikam ka Ophis.
Kat kum ka kyrwoh na u General Secretary ka HNLC Bah Sainkupar Nongtraw, “Ngi kwah ban kren da kaba shai kdar ba ka HNLC ba ieng pyrshah jur ia ki District Council, ia kiba ngi niew ba ki dei tang ki tyngshop jong ka Ri India”.
“Kano kano ka jingpyrshang ban pynwan dur ia ka synshar khadar trai ri da u President ka VPP, CEM, EM lane kino kino ki kynhun sain pyrthei lane Sorkar kin mad ia ka jingialeh ka bym pyndem. Ka HNLC kan ym artatien ban pyndonkam ia ki bor shipai lane ban shu siat iap ia kiba la jied pyrshah ia kito kiba byrngem ia ka jinglong trai bad jinglong kyrpang jong ngi” ong ka HNLC.
U Bah Sainkupar ula ong, haba ka Sorkar ka pyrshang ban pynlong ia ka elekshon Municipal, ngi la pyniap ia u Ward Commissioner ban iada ia ka kyrdan bad ka bor jong ki Rangbah Shnong. “Hapoh ki District Council, ngin ym artatien ha ka jingkut jingmut jong ngi ban iada ia ka kyrdan jong ki syiem jong ngi na kano kano ka EC, EM lane CEM kiba mut ban pyntroin ia ki” ula ong.
“Lada phi nud ban wanrah ia ka jingkylla kiba ktah ia ka rukom iaid ka synshar khadar trai ri, ngin thwet ia phi khlem ka jingshongthait bad ban pyniap ia phi, kumba ngi la pyrshang teng ban pyniap ia u Bah HS Shylla namar ka jingai NoC sha ka UCIL” ula bynrap.
Kat kum ka jingong ka HNLC, ka KHADC kala thung ia u Myntri Mynjurlang Majaw kum u Acting Syiem ka Hima Sohra da kaba pyntreikam ia ka kyndon 11 jong ka Khasi Hills Autonomous District (Appointment and Succession of Chief and Headmen Act, 1959, haba kyntait khnang ban ai sanad sha u Syiem bala jied da ka Hima.
“Kino kino ki Myntri lane riew shimet, kynthup u Myntri Mynjurlang Majaw, kiba pdiang lane treikam kum u Acting Syiem katba u Syiem ba jied da ka Hima u dang don, ka dei ka jingialeh pyrshah ba pyllein pyllein ia ka riti ka dustur. Kane ka dei ka jingjied shimet, ym ba monlang baroh. Ka HNLC kan ym shim ia kano kano ka jingbahkhlieh ia kat kaba jia” maham ka HNLC.
U Nongialam ka HNLC ula ong ba ka khubor hi ka long kaba shai bad ka bym lah ban iapynbeit da kumwei pat. “Kano kano ka jingpyrshang ban buh jingma ia ka jinglong kyrpang jong ngi, pyntlot ia ka bor jong ngi, lane pyniapait iapra ia ka Jaidbynriew lyngba ki buit sain pyrthei, ka rukom pyrkhat nongsynshar colonial, lane pynlong atiar ia ka niam, kan dei kaba ngin ialeh pyrshah khlem ka jingiapyndem. Kum kine ki kam ki dei ki jingtam ia pud bad ka jubab jong ka HNLC kan long kaba tyngeh, kaba rai kut bad ka bym sangeh”.
Ha kajuh ka por, ula ong ba ka HNLC ka iai kut jigmut ban iada ia ki Dorbar jong ki Syiem, Daloi, Rangbah Shnong bad Sordar, kiba long ki mawbyrsiew jong ka riti synshar paidbah ka Jaidbynriew Hynniewtrep bala suit la shor da ki longshuwa manshuwa kat kum bor ba iaid da ka riti ka dustur.
“Ki Dorbar jong u Syiem ki dei kiba mih hashuwa ban ia ki District Council, kiba mih hashuwa ka jingleh sain pyrthei ki seng bapher bapher, bad kiba mih hashuwa ki kyndon treikam jong ki bor synshar ki sorkar” ula ong.
Ka HNLC ka dawa ban ai noh mardor ia ka Sanad sha ki Syiem ka Sohra bala jied da ka Hima haba pynpaw “Ka jingiai pyndonkam bakla ia ka kyndon 11 kan dei ka bym lah ban pdiang,ne pynksan” kala ong haba pynpaw ba lada dang bteng ka jingiai pynslem lane tuklar ban ai Sanad ia u Syiem ka Hima yn khein kum ka jingleh khnang ban khang lynti.
“Ka jingkitkhlieh ba pura kan shong ha kito kiba pynkyllain ia ki ain, kynthup ia ki nongialam kiba pyniaid ia ka KHADC khamtam ka VPP” ong ka HNLC.
 kala byrngem ban siat iap bad hiar thma ia kino kino ki bor kiba thmu ban pyntroin ia ka iktiar jong ki bor synshar trai ri ka Jaidbynriew ba kynthup ia ki Dorbar Hima, Dorbar Shnong bad kiwei kiwei.){kind=link}