Kyndit ka HNLC ba pynim biang ka Tnad Pulit ia u Sanbor Pala
Shillong, Lber 22 : Ka seng Hynniewtrep National Liberation Council (HNLC) ha ka sngi Thohdieng, kala buh dak jingkylli la ka Tnad Pulit ka mut ban ong ba u General Secretary barim Bah Cherishterfield Thangkhiew, u dang im da kaba kam ba ki dkhot ba shah kem jong ka Seng ki dang iakren phone bad u Military Commander Sanbor Pala.
Kat kum ka jingong ka HNLC, ka kaiphod jong ka Judicial Inquiry ba khlieh da u Justice (Retired) T Vaiphei kala sot ia ka jingkam ki Pulit ba u Bah Cherishterfield Thangkhiew bad u Sanbor Pala ki dei ujuh u briew.
Ka HNLC kala pynmih ia ka jingbyrngem siat iap ia ki Heh Pulit kiba don bynta ha ka jingiap jong u Bah Cherishterfield Thangkhiew.
Ha ka kyrwoh, u General Secretary-cum-Publicity Secretary ka HNLC Bah Sainkupar Nongtraw ula ong “Ka HNLC ka kyndit ban iohi ba ka Tnad Pulit ka kren khlieh khlieh tdong tdong halor ka jingkam ba iadei bad ka audio recording, kaba pyni ia uwei u suba dkhot ka HNLC ba shah kem, ba u dang iakren bad u HNLC Military Commander Sanbor Pala”.
Ula kylli ruh “Hato ka Tnad Pulit mynta ka mut ong ba u (L) Cherishterfield Thangkhiew u lah ban dang im? Katno ngut ki mynsiem lui lui kin long langknia ha ki ktang suloi jong ki Pulit ka Jylla namar ba ka jingsuba ba dei u Sanbor Pala?. Sa mano pat ban bud? Hato kin pynlong sohpdung ia ki Nongialam Sengbhalang tang namar ka jingsuba ba dei u Sanbor Pala?”.
“Lada jia ryngkat ba ki ioh kem ia u Sanbor Pala ba shisha, ngim ym don lad ban iada ha ka ban kyntait ia ka jingithuh ia u. Shu peit ba kumno ki kem bakla ia u Tarzan Lymba (Nongialam HNYF) halor ka jingsuba don bynta ha ka jingpynbthei bomb IED” ong u Bah Sainkupar.
KA HNLC ka ong “Kat kum ka kaiphod Judicial u snem 2022 bala khlieh da u Justice (Rtd) T Vaiphei, ki Pulit kila kam ba u Bah Cherishterfield Thangkhiew ba ju khot ruh u Sanbor Pala, u donkti ha ka jingdawa pisa bad pynbthei bomb IED”.
“Kane ka jinglong jingman kala lam sha ki artylli kiei kiei : ka jingtlot ka bor syntiat ki Pulit bad ka jingshukor ia u paidbah, Sengbhalang bad ki bahaiing hasem u Bah Cherish, ba u Bah Cherishterfield Thangkhiew u dei u Sanbor Pala bad ula trei kam hapoh kane ka kyrteng sin. Ka jingpyniap ia u Bah Cherishterfield Thangkhiew ka dei ka jingsiat iap ba la suhbuit lang da ki riew sain pyrthei ba kynthup ia katto katne ngut ki Myntri hapoh ka Sorkar MDA” ula bynrap.
Haba pynpaw ba ka HNLC kala dep ithuh ia ki briew kiba don bynta ha ka jingiap u Bah Cherishterfield, u Bah Sainkupar ula ong “U Heh Pulit uba la don bynta halor ka jingiap u Bah Cherish yn sa mad ia kaei kaei. Ngi kular, ngin sa wad ia phi, ngin pynshitom ia phi bad khrai khieh ia phi. Ka jingiai thok bad jingpyrshang jong ki Pulit ban buhrieh ia ka jingshisha kala paw shai”.
U Bah Sainkupar ula ong ba ka jingkam ba ka HNLC kala ialam bakla bad pynngop ia ki samla ban kamai pisa bad ioh kali, kala pynmih ia u dak jingkylli halor ka kam ba la leh hi da kine ki borkhmih.
“Ngi la iohi ba ka Sorkar Jylla bad Sorkar Pdeng kila ai khusnam ia ki Heh Pulit bad ki shipai kiba leh ia ki kam thombor, pynshitom bein, pyniap bad set along ia ki nongialam riewlum bad ki nongshongshnong ba lui lui da ka pisa, ka jingpynkiew kyrdan, ribbon, medal bad kiwei kiwei ki khusnam” ula ong.
Une u Nongialam ka HNLC ula ong ba ki samla ka Bri Hynniewtrep ki don ka hok ban ioh khusnam na ka Jaidbynriew ne na ka HNLC lada ki ieng ban iakhun pyrshah ia ki nongthombor kiba buh jingma ia ki briew jong ngi bad ia ka Ri jong ngi.
 ha ka sngi Thohdieng, kala buh dak jingkylli la ka Tnad Pulit ka mut ban ong ba u General Secretary barim Bah Cherishterfield Thangkhiew, u dang im da kaba kam ba ki dkhot ba shah kem jong ka Seng ki dang iakren phone bad u Military Commander Sanbor Pala.){kind=link}