Shillong, Lber 17 : Ka Joint Action Committee Meghalaya Muster Roll Workers Union, kala byrngem ban pynlong ia ka jingiakhih da kaba iashong kyllain mungor khlem pud hakhmat u mot Kiang Nangbah ha Barik, lada u Myntri Rangbah Conrad K Sangma um khot ia ki sha ka jingiakren hapoh ka 9 tarik Iaiong.
U Chairman K Pariat ula pyntip ha ki nongthoh khubor ba ka jingialang hynne ka sngi Ba-ar, ka dei ka jingsdang jong ka jingiakhih ka ban jur.
“Kane ka dei namar ba u Myntri Rangbah ula kular ban iakynduh ia ngi ha u bnai Kyllalyngkot…..Ngi la hap bad haduh mynta ym shym la leh eiei” ula ong.
U Bah Pariat ula ong ba bun ki nongtrei muster roll kila dei ban shongthait ha ka rta ba 60 snem hynrei la pynbor ia ki ban shongthait ha ka rta ba 58 sem bad ka Tnad hapoh ka jingkhmih u Sangma kam shym la pyntreikam ia ki hukum shimet.
“Kam dei kaba ngi kwah ia u Myntri Rangbah ban iakynduh ia ngi” ong u Bah Pariat haba bynrap “Hynrei ka jingshisha ka long ba ka tnad Personnel bad Finance ki dei ba bat hi ma u”.
U iathuh ba ha u bnai Nohprah, u Myntri Rangbah ula kyntu ia ki “ban iai shah ngan sa iakynduh ia phi ha u bnai Kyllalyngkot” bad ha ka jingialang pre-budget ruh ula kular ban sa bishar ia ka kam VDA, hynrei ym shym la don ka jingbuddien.
Ka JAC kala kdew ia ka jingbym pat pyntreikam ia ka baidong thymmai na ka bynta ki unskilled, semi-skilled bad skilled worker, kaba pynslem haduh laibnai ban siew bainong, bad ka jingbym pyntreikam ia ka Regular Casual Workers Rules ha ka PHE wing kaba aikam haduh 3000-4000 ki muster roll.
Ha Sericulture, Handloom bad Weaving, ki kynthei kiba ri ia ki khniang ryndia la siew tang shisien ha ka khyndai bnai, ula ong bad ki nongtrei handloom kim shym la ioh tulop naduh u bnai Naitung.
“Ngi la iarai lang ban khot da ka jingiashong kyllain mungor lada kam don ka jubab hapoh ka 9 tarik Iaiong. Hynrei ngi kyrmen ba u Myntri Rangbah un khot ia ngi sha ka jingiakren khnang ba ngin ioh jingshai” ong u Bah Pariat.
“Lada ym ai jingbit ia ngi, ngin ym artatien ban mih sha surok” ula maham.
U Chairman ula ong ba shibun ki shithi na ka Tnad Personnel kila shu kut tang ha ka kot, kaba ieh ia ki nongtrei khlem ki jingmyntoi wat hapdeng ki hukum ka Sorkar.
“…shibun ki shithi bad ki jingthoh kila wan na ka tnad Personnel hynrei….kila shu kut tang ha ka kot namar ym shym la pyntreikam ia ki da ki Ophis ka Sorkar” ula ong haba buh jingkylli “La ki Ophisar kim shym la ioh ia ka hukum lane ka dei tang namar ba kim kwah ban pyntreikam” haba sit ia ka hukum ba ki nongtrei muster roll ki shongthait ha ka rta ba 60 snem kaba ki tnad ki pyntreikam kum 58.
