Shillong, Nohprah 01: Ki Samla Pule ba dang iakhih jong ka North Eastern Hill University (NEHU) kila rai ba kin nym ailad satia ia u Vice Chancellor ba mynta Prof Prabha Shankar Shukla ba un wan rung shapoh ka phyllaw ka skulbah na ka bynta ban shimti biang ia ka kam lashai ka sngi Nyngkong.
Ia kane la pyntip da u President ka NEHU Students’ Union (NEHUSU) samla Sandy Sohtun ha ka sngi U Blei haba kynthoh ia ka rai jong u Vice Chancellor ban wan shimti biang ia ka kam wat hapdeng ka jingiakhih bad jingdawa ban weng noh ia u.
“Ngin sa iapeit ia kaei ka ban jia lashai ka sngi hynrei ngin nym ailad satia ia u (Prof Shukla) ba un wan rung sha phyllaw. Ngin sa khang bad pahara ia ki khyrdop jong ka skulbah” ong u samla Sandy.
Ula ong ba ka Ministry of Education kala aipor biang sa 15 sngi ia ka Committee ki arngut ki dkhot ba tohkit ia ki jingkynnoh pyrshah ia u Vice Chancellor hynrei kam shym la don satia kano kano ka shithi ba pynpaw ba la leh eiei ia mynta shipor kaba long pyrshah ia u.
“Lada ka jingtohkit ka dang iaid pyrshah ia u (Prof Shukla), ngi khmih lynti ba ka dei ban don ka kynja hukum ban weng kam shipor shuwa ia u hynrei ka Ministry ka khlem leh eiei halor kane ka bynta” ong une u Nongialam.
“Lada u VC u pyrshang ban wan shimti biang ia ka kam, ngi ruh ngin sa thoh sha ka Ministry namar ngi khmih lynti ba ka dei ban leh eiei pyrshah ia u ia mynta shipor naba baroh ki kynhun ha NEHU kila pyrshang jur ia ka jingwan phai jong u sha ka skulbah” ula bynrap.
Ka NEHUSU ha ryngkat ka KSU-NEHU Unit kila pynsangeh shipor ia ka jingakhih shah thngan ba khlem pud bad kren shai sha ka kynhun tohkit ba ka jingwanphai u Prof Shukla sha NEHU ka dei kaba kim pdiang satia .
Dang shen, u Prof Shukla ula pan ia ka bor pahara kaba khlain na ka Sorkar Pdeng ba un wan shimti biang ia ka shuki VC ha ka 2 tarik u Nohprah.
Ha ka shithi bala phah sha u Principal Secretary in-charge Higher Education, ka Sorkar India, u Prof Shukla ula ong “Ka shuti jong nga kan kut ha ka 29.11.2024, bad ngan leit shimti biang ia ka kam ha NEHU ha ka 02.12.2024”.
Ula kynnoh “Kala wan sha ka jingtip jong nga ba katto katne ki runar na ki seng bapher bapher jong ka skulbah, lyngba u Incharge Vice Chancellor, kila pyniaid beain ia ki kam hapoh ka Campus, bad pynmih ia ki hukum bad circular ki ba khlem ioh bor”.
 kila rai ba kin nym ailad satia ia u Vice Chancellor ba mynta Prof Prabha Shankar Shukla ba un wan rung shapoh ka phyllaw ka skulbah na ka bynta ban shimti biang ia ka kam lashai ka sngi Nyngkong.){kind=link}