Shillong, Rymphang 3: Ka United Democratic Party (UDP) hynne ka sngi kala byrngem ban mudui sha u Chief Electoral Officer (CEO) ka jylla pyrshah iaka jingleh shilliang u Myntri Rangbah ka jylla haba ba iadei bad ka jingpyllait skhim lyngba ka Chief Minister’s Special Development Fund (CMSDF).
Haba kren sha ki lad pathai khubor u Vice President ka UDP bah Allantry Dkhar ula iathuh ba u Myntri Rangbah ka jylla haka 3 tarik Kyllalyngkot ula pyllait T.58,76000 shaka ophis Deputy Commissioner (DC)ka East Khasi Hills ba dei khmih iaka tnat kam pynroi.
U bah Allantry ula iathuh ba iaka Order naka bynta ban pyndonkam iaka song pisa ba T.58,76000 la mang naka bynta 10 tylli ki kam ba kynthup naka bynta ka North Shillong bad West Shillong constituency ba ka National People’s Party ka pynieng kyrtong ban iakhun ha kane ka ilekshon ban wan.
“Kaba sngewphylla ba haka Order la pynpaw iaka kyrteng jong u kyrtong ka NPP na North Shillong bah Ransom Sutnga Sutnga, Mawkhar 793001 naka bynta pyntrei iaki kam lyngba ka song pisa bala pyllait kaba kot haduh T.58,76000” la kynnoh u bah Allantry.
U bah Allantry ula iathuh ba ia kane ka song pisa T.58,76000 la mang naka bynta ban pyntrei iaki kam pynroi ha North Shillong ba kynthup ia ka community Hall ha Jaiaw Lower Lansolane block, ka community hall jong ka Mawkhar Dorbar Shnong, ban buh CCTV ha Upper Jail Road, ha Lower Jail Road, ha Lawmali, ha Jaiaw Pdeng, ha Khyndai Lad bad ha Thana Road, ka jingpynbha iaka Jaiaw Community Hall, ban pynbha iaka surok ban poi sha LP School kaba don ha Forest Colony bad ban pynbha iaki bynta jong ka JJM Nicholas Roy Model Trust kaba don ha Lumdiengjri kaba hap haWest Shillong konstitwensi.
U la kynnoh ba ha kane ka Order ban pyndonkam iaka song pisa ba kot haduh T.58,76000, ym shym la pynpaw iaki kyrteng jong kito ki ban pyntrei ia kine ki kam pynroi hynrei la pynpaw beit tang ka kyrteng u bah Ransom Sutnga u badei u kyrtong ka NPP na North Shillong.
“Namar kane ka jingpyllait pisa da u Myntri Rangbah ka noh shilliang bad ka UDP kala shim iaka rai ban thoh shaka ophis u CEO ban phah tohkit halor kane” la ong u bah Allantry.
