Shillong, Rymphang 18: Ka seng Hynniewtrep Integrated Territorial Organisation (HITO) hynne ka sngi kala byrngem ban ujor da ka mukotduma bai mynraiñ khmat lane ka ‘Defamation Case’ pyrshah ia u Myntri ka tnad kam pohïng ka ri u Amit Shah.
Ia kane ka HITO kala byrngem ia u Amit Shah namar ka jingkynnoh baka Meghalaya kadei ka jylla ba bamsap tam hapoh ka ri India.
Haba kren sha ki lad pathai khubor, u president ka HITO u bah Donbok Dkhar ula ong ba lada u Amit Shah u sngew baka jylla Meghalaya kadei ka jylla ba bamsap tam hapoh ka ri India udei ban phah tohkit daka Central Bureau of Investigation (CBI) bad da ka Enforcement Directorate (ED) bad lada lap iaki ba bamsap dei ban pynshitom katkum ka ain.
U bah Donbok ula ong ba ka seng HITO kan sa phah da ka shithi sha u Amit Shah ban phah tohkit naka bynta ban lap ïa ka jingshisha bad ban kem ïa ki briew kiba donkti ha ka ban bamsap wat lada ka dei ka sorkar kaba rim ne ka sorkar kaba thymmai ruh.
“Ha ka 16 tarik u bnai Nohprah 2021 bad ha ka 8 tarik u bnai Nailur 2022, ka seng ka la phah daka shithi ban phah tohkit da ka CBI bad ka ED iaka jingbamsap bampong hynrei haduh mynta kam shym la don ka jingtohkit bad mynta dang shen u Amit Shah ula pynskhem ba ka don shisha ka jingbamsap hapoh Meghalaya” la ong u Donbok.
U bah Donbok ula ong ba u Amit Shah u dei ban ai mardor ia katei ka jingtohkit ba la tohkit da ka CBI lane ka Enforcement Directorate hapoh ka 23 tarik u bnai Rymphang 2023 khnang ban pynshitom ia ki briew kiba bamsap bad lada um leh hapoh ka tarik kaba la buh, ka seng kam banse ban ai da ka mukotduma bai mynraiñ khmat lane ka Defamation Case pyrshah ia u Amit Shah.
