Shillong, Jymmang 16: Ki Nongtrei jong ka MeECL hapoh ka shatri jong ka Coordination Committee of Registered MeECL (Employees) Associations and Unions (CCORMAU) hynne ka sngi Ba-ar, kila byrngem ban sangeh treikam bad pynlong ia ki jingiakhih ha ki kynta long trei halor ka jingkynnoh leh bym hok jong ki bor pyniaid haba pyllait ia ka tulop jong ki Nongtrei.
Hynne ka step daki spah ngut ki dkhot ka CCORMAU kila ia mih sha phyllaw ophis treikam ka MeECL Shillong ha ryngkat bad ki Placard ba dawa naki bor pyniaid ka tnat sam bording ban pyllait noh ia ka tulop jong u bnai Iaiong 2023.
Haba kren sha ki lad pathai khubor u Vice President ka CCORMAU bah Arju Dkhar ula ong ba kane ka jingshah set tulop ki nongtrei ka MeECL kam dei ka sien ba nyngkong bad dei namar kane ki nongtrei kim lah shuh ban shah, ka ba la pynlong iaki ban ia mih ban pyni iaka jingpyrshah.
U bah Arju ula kynnoh ba kane ka jingleh ka MeECL ban set bad ban pyllait slem iaka tulop jong ki nongtrei ka long kaba be-ain. Ula ong ba ka MeECL ka dei ban siew ia ka tulop jong ki Nongtrei hapoh ka 10 tarik manla u bnai kat kum ka kyndon 17 jong ka Wage Act.
“Ka jingioh nong jong ka MeECL ka long ym duna iaka T. 80 haduh T. 110 crore hynrei ka long ka ba sngewsih ban iohi ba ki bor pyniaid iaka MeECL kim lah ban pyllait iaka tulop jong ki nongtrei…namar kane ka Union kala rai ban mih madan ban iakhih naduh ka 11 tarik jong man u bnai tad haduh ba ka bor pyniaid ka pyllait ia ka tulop ha ka por kaba dei” la ong u bah Arju.
U bah Arju ula ong ba ki nongtrei ki sngewthuh ba ka MeECL ka don bun ki ram ba ka hap siew khamtam iaka NEEPCO hynrei ki bor pyniaid ia kane ka tnat sam bording kidei ruh ban sngewthuh ba ki nongtrei ki donkam ban ioh tulop naka bynta ban pyniaid iaka iing ka sem.
