Shillong, Jylliew 25 : Ki Nonghikai skul ha East Jaintia Hills District ha ka sngi U Blei kila byrngem ban pynlong da ka jingiakhih lada ki bor District kim pynsangeh noh ia ka jingthmu pyntreikam ia ka Ubiattendance App, kaban shim jingkhein ia ka jingwan ki Nonghikai sha skul.
Hapoh ka lama jong ka Jaintia Hills Lower Primary School Teachers Association (JHLPSTA) Khliehriat Unit bad Meghalaya SSA Association (MSSASA) East Jaintia Hills District Unit, ki nonghikai kila rai ruh ban nym leit iashimbynta ha ka Training programme bala pynbeit da ka District Mission Coordinator (DMC) kaba long kat kum ka jingbthah jong u Deputy Commissoner naduh ka 26 tarik Jylliew ha ka 28 tarik Jylliew.
“Hadien ka shuti shiteng snem, ngin sa shim ia ka sienjam ba tyngeh halor kane ka kam. Ngin sa pynlong ia ka jingiashong kyllain mungor hakhmat ka Ophis u DC ban dawa pynsangeh noh mardor ia ka jingpyntreikam ia ka Ubiattendance App” ong u Aristotle C Rymbai, President ka MSSASA.
“Ngi kyntu ruh ia baroh ki Nonghikai ban nym leit iashimbynta ha ka Training Programme bala pynbeit da ka DMC naduh ka 26 tarik Jylliew haduh ka 28 tarik namar ngi la dep ban aiti da ka shithi naduh ka 19 tarik Jylliew, ba pynpaw ia ka jing pyrshah kaba jur ban pyntreikam ia kane ka App” ula bynrap.
Ia kane ka rai la shim hadien ba u Deputy Commissioner ula pynmih ia ka hukum ha ka 21 tarik Jylliew, ba bthah ban pyntreikam noh ia ka Ubiattendance App hapoh ka District khnang ban buh jingkhein ia ka jingwan ki nonghikai sha skul.
U DC ula bthah ia ka DMC bad SDSEO jong ka District ba kin bthah ia baroh ki Nonghikai kiba hikam ha ki skul Sorkar bad ki skul ba iarap ka Sorkar lem bad ki SSA ba kin register bad pyndonkam ia ka Ubiattendance App naduh ka 1 tarik Naitung.
U Bah Rymbai ula ong ba kine ki arseng kila kyntu ia u Myntri ka Tnad Pule Puthi Rakkam A Sangma ba un tuklar lem ha ka 23 tarik Jylliew halor kane ka jingtyrwa ban pyntreikam ia ka Ubiattendance App hapoh ka Jylla.
“Ngi kyndit ban tip na u Myntri ba u DC ula pyntreikam ia ka Ubiattendance App khlem ka jingai jingmynjur jong ka Sorkar Jylla. Namar kata, u Myntri ula bthah ia u Director ka School Education & Literacy (DSEL) ban pan jingpynshai na u Deputy Commissioner ka East Jaintia Hills bad ban aiti ia ka kaiphod halor kane ka kam” ula ong haba bynrap “Ngi la kyndit ruh halor ka shithi bala ai da ka DMC sha baroh ki cluster resource person ba kin pynlong ia ki jingai jinghikai ba kumno ba kin pyndonkam ia ka Ubiattendance App”.
“Namar kata, ngin pynrem ia ka jingleh jong u CM ban pynlong ia ka jingai jinghikai ha ka por ba baroh ki skul ki dang pynlong ia ki eksam shiteng snem. Ka jingkylli ka mih la ki nonghikai kin leit sha skul ban pyniaid ia ki eksam lane leit sha ka training programme. Kane ka pyni shai ba ki artylli ki Ophis u DC bad DMS kim don jingkitkhlieh satia halor ki jingeh ba iakynduh da ki Khynnah Skul hynrei ki kham khein kongsan kumno ban pyntreikam ia ka Ubiattendance App ia kaba ngi sngew baka dei ka bym lah satia ban pdiang” ula ong.
Pule lang ia kane: Pynbna ka KSU ban iakhun da ka thma pyrshah ia u Droks ha Jylla
 Khliehriat Unit bad Meghalaya SSA Association (MSSASA) East Jaintia Hills District Unit, ki nonghikai kila rai ruh ban nym leit iashimbynta ha ka Training programme bala pynbeit da ka District Mission Coordinator (DMC) kaba long kat kum ka jingbthah jong u Deputy Commissoner naduh ka 26 tarik Jylliew ha ka 28 tarik Jylliew.){kind=link}