Shillong, K’lyngkot 05 : Haduh hynniew ngut ki Nonghikai skul kiba la pass ia ka Meghalaya Teachers Eligibility Test (MTET), kila byrngem ban mih surok bad ban iakhih lada ka Sorkar Jylla kam lah ban thungkam noh ia ki kum ki Assistant Teacher hapoh ka artaiew.
Kine ki Nonghikai ki kynthup ia I Kong Phikirbha Khariah, Arbihlang Suchiang, Thlamuana Darnei, Laljoy Darni, Mary Jone Ngamlai, Lalchonpari Theite bad Samiran Rishi.
Haba iakren bad ki lad pathai khubor hynne ka sngi palei, I Kong Phikirbha Khariat, ila pyntip ba ki don haduh 24 ngut ki Nonghikai kiba la iakhun ia ka eksam MTET hynrei tang 7 ngut kila pass ia kane ka eksam kaba la pynlong ha ka 9 tarik u Risaw 2021 hadien ba ka Sorkar kala pynjynsur ia ka rta thungkam jong ki Nonghikai bala heh rta.
Ila pyntip ba ki Nonghikai kila pyndep ia baroh ki kyndon bala buh da ka NCERT ban iohkam kaba ong ba ki nonghikai ki hap ban pass ia ka MTET ba kin long kiba ibit ban thung ha ka kam Assistant Teacher ha ki skul Sorkar.
Ka Mary Jone Ngamlai kala ong “ U Myntri ka Pule Puthi ma Lahkmen Rymbui, ula lum ia ka jingialang bad ki nongialam jong ki Nonghikai Contract kiba iakhun ban thungkam pura kum ki Assistant Teacher. Ha kane ka jingialang, u Myntri ula pynshai ba ka jingthungkam pura ka lah ban long tang hadien bala pyndep ia ki kyndon ka NCERT kaba la pyntreikam da ka Sorkar Jylla ba kynthup ia ka jingpass ia ka D.El.Ed bad MTET”.
Kine ki Nonghikai kila pynpaw ia ka jingbynniaw ba watla kila pyndep ia ki kyndon thungkam hynrei haduh mynta ka Sorkar kam pat shym la thungkam satia ia ki kum ki Assistant Teacher.
“Ngin aipor artaiew ia ka Sorkar ba kan thungkam bad lada kam lah ban pynurlong ia kane, ngim don lynti da kumwei pat hynrei ban mih sha surok bad ban iakhih ha kaban dawa iala ka jong ka kam” kila pynpaw.
