Shillong, Rymphang 15: Ka Joint Action Committee jong ki Waheh Shnong ka East Jaintia Hills,ha ka sngi Palei kila byrngem ban pynlong da ki jingiakhih lada ka Sorkar kam maramot noh ia ka surok National Highway-6 na Lumshnong sha Malidor.
Ka JAC kala iakynduh ruh ia u Symbud Myntri Rangbah ba khmih ia ka Tnad PWD (Roads) Bah Prestone Tynsong ban dawa maramot noh mar mar ia kane ka surok.
U Secretary ka JAC bad Rangbah Shnong ka Pyrtakuna Love You Bareh ula iathuh ba u Symbud Myntri Rangbah ula pyntip ia ka kynhun ba ia kane ka surok la dep ban ai work order ha kaban maramot bad ka jingpyntrei ia ka kam kan sa sdang noh shen.
Hynrei ula ong ba ka JAC kam banse ban hap pynlong ia ka jingiakhih lada ka jingmaramot ia ka surok kam sdang noh hapoh ka 15 sngi.
U Bah Bareh ula pyntip ba ka JAC kala iakren ruh bad u DyCM halor ki kam ba iadei bad ka jingrung beain jong ki nong Bangladesh sha Meghalaya haba kyrpad ba ki BSF ki dei ban iada ia ka khappud na ka bynta ka jingshngain jong ki trai shnong.
“Ngi la iakren ruh halor ka jingdonkam ban kyntiew kyrdan ia ka Umkiang PHC sha ka CHC ha kaba u DyCM ula kular ba un sa tuklar ia ka kam” ong u Bah Bareh.
U iathuh ba u DyCM ula pyntip ruh ba ka jingpyntrei ia ka Land Custom Station (LCS) ha Narpuh Elaka kala iaid shaid shaid hadien ka jingai jingmynjur jong ka Sorkar Pdeng.
